Moeletsi oa Basotho Beke ea 32 har’a selemo
Labone
Ho baloa Lengolong la Moapostola Paulosi ho Filemone (7-20)
“Ke mo khutlisetsa ho uena, e seng joaloka lekhoba empa e le moena ea ratehang haholo-holo.”
Moratuoa! Ke ile ka thabisoa haholo, ka ba ka tšeliseha, ka lerato la hau; hobane lipelo tsa bahalaleli li ile tsa khatholloa ke uena, ngoan’eso.
Ka baka lena, le hoja ke e-na le matla a maholo ho Kriste Jesu a ho u laela se tšoanelehang, ke mpa ke u rapela ka lerato, uena u leng joaloka ‘na Paulosi, eo e seng e le leqheku, e bile e ntse e le motlamuoa ka baka la Jesu Kriste.
Joale eo ke ratang ho mo rapella ho uena ke ngoan’a ka Onesime, eo ke mo tsoetseng moeeng ke le litlamong, ea neng a se a se na thuso ho uena pele, empa ea nang le thuso ho ‘na le ho uena joale, eo ke mo khutlisetsang ho uena. Mo amohele hle; pelo ea ka e ho eena.
Ke ne ke lakatsa ho ‘moloka hore a ntšebeletse, bakeng sa hau, litlamong tseo ke leng ho tsona ka baka la Evangeli; empa ha nka ka rata ho etsa letho ka ntle ho tumello ea hau, e leng hore thuso ea hau e se be joaloka qobello, empa e be ka ho rata.
Mohlomong Onesime o ile a arohana le uena nako e seng kae, hore u boele u be le eena kamehla eohle e seng joaloka lekhoba, empa e le ea fetang lekhoba, hobane e se e le moena ea ratehang haholo-holo ho ‘na athe ho uena o tla rateha esita le ho feta, e le motho oa hau, le teng e le ngoan’eno moreneng.
Ha eba u ntalima ke le molekane oa hau tumelong u mo amohele joaloka ha eka ke ‘na ka sebele. Ha eba a u senyelitse ka ho hong, kapa a e-na le molato ho uena, u o botse ‘na. Ke ‘na Paulosi ea ngolang sena ka letsoho la ka: ke tla u buseletsa; ke sa bolele hore le uena u na le molato oa seo u leng sona ho ‘na. E, ngoan’eso a nke ke utloe monate ka uena Moreneng, u thabise pelo ea ka Moreneng.
PESALEMA 145
HO LEHLOHONOLO EA THUSOANG KE MOLIMO OA JAKOBO.
Ho lehlohonolo ea thusoang ke Molimo oa Jakobo,
eena ea nang le botšepehi bo se nang bofelo,
ea ahlolelang ba tlatlaptjoang
‘me ea fang ba lapileng bohobe.
Morena o lokolla batšoaruoa,
Morena o tutubolla mahlo a lifofu,
Morena o kobolla ba khokhopaneng,
Morena o rata ba lokileng.
Morena o alosa bajaki,
o phallela khutsana le mohlolohali,
empa ba khopo o ba lahlisa tsela.
Morena ke khosi ea kamehla,
Molimo oa hau, Sione, ke oa meloko le meloko.
Ho baloa Evangeling e halalelang e ngotsoeng ke Luka. (17,20-25)
“’Muso oa Molimo o ka ho lona.”
Ka nako eo, Bafarisi ba botsa Jesu hore na ‘muso oa Molimo o tla tla neng. A ba araba, a re: ‘Muso oa Molimo ha o tle ka mokhoa o bonoang ka mahlo; ‘me ho ke ke ha thoe: Bonang o mona, kapa bonang o mane. Hobane ‘muso oa Molimo o ka ho lona.
Joale a re ho barutuoa ba hae: Matsatsi a tla tla, ao ka ‘ona le tla lakatsa ho bona letsatsi le le leng la Mor’a motho, ‘me le ke ke la le bona. ‘Me ba tla re ho lona: Bonang o mona, bonang o mane. Le se ke la ea, la mathela teng. Hobane joaloka ha lehalima le benyang leholimong le halima ho tloha ntlheng e ‘ngoe ea leholimo ho fihla ho e ‘ngoe, Mor’a motho o tla ba joalo ka letsatsi la hae. Empa pele e ka khona a utloe mahloko a mangata ‘me a lahloe ke moloko ona.
