Moeletsi oa Basotho Beke ea 32 har’a selemo
Laboraro
Ho baloa Lengolong la Moapostola Paulosi ho Titus. (3,1-7)
“Ha re ne re lahlehile, ke ka mohau oa hae a re pholositseng.”
Moratuoa! Hopotsa bohle hore ba tšoanetse ho ikokobetsa ho marena le ho ba behiloeng boholong, ho ba mamela le ho itokisetsa ho phetha mesebetsi eohle e molemo. Ba se ke ba bua motho hampe, ba tšabe litsekisano, ba be bonolo ‘me ba etsetse batho bohle ka mosa o moholo.
Ka nako e fetileng le rona re ne re le lithoto, re hana ho mamela, re lahlehile, re busoa ke litakatso le menyaka e mengata, re phela bokhopong le mohonong, re hloeehile, re hloeane.
Ho bonahetse mosa oa Molimo, Mopholosi oa rona, le lerato la hae ho batho. Ha se ka baka la mesebetsi e lokileng eo re e entseng, empa ke ka mohau oa hae a re pholositseng, ka hlatsuo e leng tsoalo ea bobeli, eo Moea o Halalelang o re nchafatsang ka eona.
Moea ona, Molimo o o tšetse ka bongata holim’a rona, ka Jesu Kriste Mopholosi oa rona. Ka mokhoa o joalo, ka mohau oa hae, o re entse batho ba lokileng, ‘me ho ea ka tšepo ea rona, re entsoe majalefa a bophelo bo sa feleng.
PESALEMA 22
MORENA KE MOLISA OA KA, NKE KE KA HLOKA LETHO.
Morena ke molisa oa ka, nke ke ka hloka letho.
O nkatla makhulong a matalana.
O ntsamaisetsa metsing a khutsitseng,
o matlafatsa bophelo ba ka.
O ntataisa tseleng e nepahetseng
ho tlotlisa lebitso la hae.
Leha nka tsamaea khohlong e lefifi ba lefu,
ha ke tšabe bobe bofe kapa bofe,
U ntekela tafole
pontšeng ea lira tsa ka,
u ntlotsa hloho ka oli,
mohope oa ka oa khaphatseha.
Efela lehlohonolo le mohau li tla mphelehetsa
ka matsatsi ‘ohle a bophelo ba ka;
ke tla lula, ka tlung ea Morena
ha feela ke ntse ke phela.
Ho baloa Evangeling e halalelang e ngotsoeng ke Luka. (17,11-19)
“Ha ho le ea mong ea khuttileng ho tlotlisa Molimo, ha e se molichaba enoa.”
Ka nako eo, eitse ha Jesu a le tseleng, a ea Jerusalema, a feta lipakeng tsa Samaria le Galilea. Eare ha a kena motseng o mong, a khahlametsoa ke banna ba leshome ba balepera. Ba ile ba ema hole, ‘me ba phahamisa mantsoe, ba re: Jesu, Moruti, ak’u re hauhele! Ha a ba bona, a re: E-eang, le itlhahise ho baprista.
‘Me ha etsahala hore, ha ba ntse ba e-ea, ba hloekisoe. E mong oa bona, ha a bona hore o hloekisitsoe, a khutla, a nts’a rorisa Molimo ka lentsoe le phefa: ‘me a itihela ka sefahleho maotong a Jesu, a mo leboha, Enoa e ne e le Mo-samaria.
‘Me Jesu a botsa, a re: Na ha se ba leshome ba hloekisitsoeng na? Ba robong ba kae? Ha ho le ea mong ea khutlileng ho tlotlisa Molimo, ha e se molichaba enoa. Eaba o re ho eena: Ema, u ikele, tumelo ea hau e u pholositse.
