Moeletsi oa Basotho Beke ea 32 har’a selemo
Sehopotso sa Josaphat ea Halalelang, Mobishopo le Moshoela-Tumelo
Labobeli
Ho baloa Lengolong la Moapostola Paulosi ho Titus. (2,1-8.11-14)
“Re phele ka ho loka, re ntse re lebeletse lehlohonolo, leo re le tšepisitsoeng, le ho hlaha ha letlotlo la Molimo oa rona, Jesu Kriste, Mopholosi oa rona.”
Moratuoa! Bolela tse tšoanelang thuto ea ‘nete. Banna ba holileng ba be le boitšoaro linong, bohloeki le bohlale, ba tiee tumelong, leratong le boiphapanyong. Ka mokhoa o joalo le basali ba holileng ba apare ka mokhoa o halalelang, e se ke ea e-ba basebi, kapa ba hlanyetsang veine, ba rute tse lokileng, ba tle ba tsebe ho ruta ba bacha bohlale hore ba rate banna ba bona le bana ba bona, le hore ba be seli, ba be le bohloeki le boitšoaro linong, ba hlokomele matlo a bona, ba be mosa ‘me ba mamele banna ba bona, Lentsoe la Molimo le tle le se ke la nyefoloa.
Ka mokhoa o joalo khothatsa banna ba bacha ho ba le boitšoaro nthong tsohle; ‘me uena ka sebele u ba behele mehlala ea mesebetsi e molemo nthong sohle, thutong, ho lokeng le boitlhomphong. Polelo ea hau e be ea ‘nete, e sa nyatseheng, hore ea re hanyetsang a tšabe ‘me a hloke bobe boo a ka re buang ka bona.
Mohau oa Molimo, oo e leng mohloli oa pholoho ho batho bohle, o iponahalitse ho re ruta ho furalla maikutlo a ho se tšabe Molimo le litakatso tsa lefatše, hore re tle re phele ka boitšoaro, ka ho loka le ka tšabo ea Molimo lefatšeng lena, re ntse re lebeletse lehlohonolo leo re le tšepisitsoeng, le ho hlaha ha letlōtlo la Molimo oa rona ea phahameng haholo, Jesu Kriste, Mopholosi oa rona.
O inehetse ka baka la rona, hore a re lopolle bokhopong bohle, a tle a re etse sechaba se hloekileng, seo e tla ba sa hae, se chesehellang mesebetsi e metle.
PESALEMA 36
PHOLOHO EA BA LOKILENG E TSOA HO MORENA.
Tšepa Morena, ‘me u etse tse ntle,
aha lefatšeng, ‘me u iphelele ka khotso.
Ithabele ka Morena,
‘me o tla araba likopo tsa pelo ea hau.
Morena o tseba litšiu tsa ba se nang molato,
lefa la bona ha le na ho fela;
Ho tsamaea ha motho ho matleng a Morena,
o mo tiisa tseleng eo a khahloang ke eona.
Sesefa bobe, u etse botle,
‘me u tla ba le lehae kamehla;
Ba lokileng ba tla rua lefatše,
ba ahe ho lona kamehla.
Ho baloa Evangeling e halalelang e ngotsoeng ke Luka. (17,7-10)
“Re bahlanka ba se nang thuso, re phethile seo re neng re tlamehile ho se etsa.”
Ka nako eo, Jesu a re: Ke mang ho lona ea nang le mohlanka ea lemang kapa ea alosang eo ekareng ha mohlanka eo a e-tsoa masimong, a re ho eena: Tloo kapele, ‘me u lule lijong? Na a ke ke a mpa a re ho eena: Ntokisetse lijo tsa ka tsa mantsiboea; u itlame, u ntšebeletse ha ke e-ja ‘me ke e-noa, ‘me kamorao, le uena u tla ja, u noe? Ana o tla leboha mohlanka eo hobane o entse tseo a mo laetseng tsona? Ha ke hopole.
Le ho lona ho joalo. Ha le phethile tsohle tseo le li laetsoeng, le ke le re: Re bahlanka ba se nang thuso, re phethile seo re neng re tlamehile ho se etsa.
