Moeletsi oa Basotho Beke ea 29 har’a selemo
Labotšelela
Ho baloa Lengolong la Moapostola Paulosi ho Ba-Efese. (4,7-16)
“Kriste ke eena hloho ‘me ka eena ‘mele kaofela o fumana ho hola.”
Bana beso! E mong le e mong oa rona o filoe neho eo e leng ea hae, ho ea kamoo Kriste a lekantseng mpho ea hae kateng. Ke ka baka leo ho thoeng: o ile a nyolohela holimo, a ea le batlamuoa; o ile a fa batho limpho.
Hore o ile a nyoloha ke ho re’ng, ha e se hore le teng o n’a ile a theohela liqalong tse ka tlase tsa lefatše? ‘Me ea ileng a theoha, ke eena ka sebele ea ileng a nyolohela ka holimo ho maholimo ‘ohle, a tle a tlatse tsohle.
Ke eena hape ea fileng ba bang ho ba baapostola, ba bang ho ba baprofeta kapa baevangelista, kapa balisa le baruti. Ka mokhoa ona, bahalaleli ba hlophiselitsoe mosebetsi oa tšebeletso, ‘Mele oa Kriste o tle o hole hofihlela ha bohle hammoho re finyella bonngoeng ba tumelo le ba tsebo ea Mora oa Molimo, le boemong ba Motho ea phethehileng, ea tiileng, ea nang le botlalo ba Kriste.
Ha ho le joalo, ha re sa le bana ba tsokoletsoang koano le koana, ba feto-fetoleloang moeeng ofe le ofe oa thuto ke bolotsana ba batho ba thetsang ‘me ba khelosang ba bang ka mamene-mene. Empa, ka ho latela ‘nete le ka ho phela leratong, re tla hola ka mekhoa eohle ho Kriste.
Ke eena hloho ‘me ka eena ‘mele kaofela, o hlomahantsoeng ‘me o kopaneng hantle ka manonyello ‘ohle, a thusanang ka mosebetsi o lekanyelitsoeng setho se seng le se seng, o fumana ho hola le ho ahoa ha oona leratong.
PESALEMA
KE ILE KA THABA HA HO THOE HO ‘NA: A RE EENG TLUNG EA MORENA.
Ke ile ka thaba ha ho thoe ho ‘na:
“A re eeng Tlung ea Morena.”
Joale maoto a rona a se a hatile
likhorong tsa hao, uena Jerusalema.
Jerusalema e ahiloe e le motse
oo tsohle tsa oona li matahaneng hamonate.
Meloko eohle, e leng meloko ea Morena,
e nyolohela teng ho boka Morena,
ho ea kamoo Israele a laetsoeng kateng.
Ke moo ho behiloeng litulo tsa kahlolo,
litulo tsa ntlo ea Davida.
Kopelang Jerusalema khotso, le re:
“Ba u ratang ba ke ba pholohe.”
Ho baloa Evangeling e halalelang e ngotsoeng ke Luka. (13,1-9)
“Ha le sa bake, le tla timela joalo kaofela.”
Ka nako eo, batho ba bang ba fihla, ba tsebisa Jesu tse hlahetseng Ba-Galilea bao Pilato a ileng a kopanya mali a bona le a mahlabelo a bona. Jesu a araba, a re ho bona: Na le hopola hore Ba-Galilea bao, ba ileng ba bolaoa ka tsela ena, e bile baetsalibe ho feta Ba-Galilea ba bang bohle? Kea le bolella ha ho joalo. Empa ha le sa bake, le tla timela joalo kaofela. Joaloka bale ba leshome le metso e robileng meno e ‘meli, bao tora e ileng ea ba oela holimo Siloe, ‘me ea ba bolaea, na le hopola hore ba bile le molato o moholo ho feta baahi bohle ba Jerusalema? Kea le bolella, ha ho joalo. Empa ha le sa bake, le tla timela kaofela ka mokhoa o tšoanang.
Joale a ba bolella papiso ena, a re: Motho e mong o n’a e-na le sefate sa feiga se lenngoeng tšimong ea hae ea morara. A tla ho batla litholoana ho sona, empa a li hloka. Eaba o re ho molemi oa morara: E se e le lilemo tse tharo ke ntse ke e-tla, ke batla litholoana sefateng sena sa feiga, ke sa li fumane. Se reme. Ke’ng ha se ja mobu feela? Empa molemi a araba, a re ho eena: Morena, ak’u se tlohele hape ka selemo sena, ke tle ke se lemele, ‘me ke se tšelle moiteli. E ka ba se tla beha litholoana isao. Ho seng joalo, u tl’u se reme.
