Moeletsi oa Basotho Beke ea 29 Har’a selemo
Labohlano
Ho baloa Lengolong la Moapostola Paulosi ho Ba-Efese (4,1-6)
“’Mele o mong, Morena o mong, Tumelo e ‘ngoe, hlatsuo e ‘ngoe.”
Bana beso! ‘Na ha ke le litlamong ka baka la Morena, kea le rapela, le mpe le phele ka mokhoa o tšoanelang pitso eo le e bilelitsoeng: Ka boikokobetso bohle, ka bonolo, ka mamello, ka ho iphapanyetsana ka lerato.
Le thahaselle ho boloka bonngoe bo tsoang ho Moea o Halalelang le ho bo tiisa ka tlamahano ea khotso. ‘Mele o mong le Moea o mong, joaloka ha le tšepo eo le bilelitsoeng ho eona e le ‘ngoe.
Morena o mong, tumelo e ‘ngoe, hlatsuo e ‘ngoe. Molimo o mong eo e leng Ntat’a bohle, ea phahametseng bohle, ea sebetsang ho bohle, ‘me ea leng teng ka ho bohle.
PESALEMA 23
O JOALO MOLOKO OA BA BATLANG HO HLAHA PEL’A HAU, MORENA.
Lefatše ke la Morena le tsohle tse ho lona:
lefatše le baahi bohle ba lona.
O n’a le thehe holim’a maoatle,
a le tiisa holim’a maliba.
Ke mang ea ka nyolohelang thabeng ea Morena,
ke mang ea ka emang qalong e halalelang ea hae?
Ke ea se nang mali matsohong,
ea pelo e hloekileng.
Enoa ke eena ea tla fumana mahlohonolo ho Morena,
ea tla ahloleloa ke Molimo, mopholosi oa hae.
O joalo moloko oa ba mo batlang,
oa ba batlang ho hlaha pel’a hau,
uena Molimo oa Jakobo.
Ho baloa Evangeling e halalelang e ngotsoeng ke Luka. (12,54-59)
“Le tseba ho hlalohanya sebopeho sa leholimo le sa lefatše; empa ho ea ka’ng ha le sa tsebe ho hlalohanya nako ea joale?”
Ka nako eo, Jesu o n’a re ho matšoele: E ee e re ha le le bona leru le nyoloha bophirimela, kapele-pele le re pula e tla na; ‘me ho be joalo. Empa ha ho foka moea o tsoang boroa, le ee le re: ho tla futhumala, ‘me ho be joalo. Baikaketsi, le tseba ho hlalohanya sebopeho sa leholimo le sa lefatše; empa ho ea ka’ng ha le sa tsebe ho hlalohanya nako ea joale?
Ke’ng ha le sa tsebe ho ikhethela ho lokileng? Ekare ha u ea ho morena le e mong eo le tsekisanang le eeng, u leke ho lokisa litaba le eena le sa le tseleng, e se re mohlomong a u hulela ho moahloli, ‘me moahloli a u nehela molefisi, ‘me molefisi, a u hlahlela chankaneng. Kea u bolella, u ke ke ua tsoa teng ho fihlela ha u lefile esita le cheletana ea ho qetela.
