Moeletsi oa Basotho Beke ea 29 Har’a selemo
Labone
Ho baloa Lengolong la Moapostola Paulosi ho Ba-Efese (3,14-21)
“Le tla tseba ho utloisisa bophahamo le botebo ba lerato, le tle le tlale ho phetheha hohle ha Molimo.”
Bana beso! Ke khumamela Ntat’a Morena oa rona Jesu Kriste, eo bo-ntata bohle maholimong le lefatšeng bo reheletsoeng ka eena. A ke a le nehe ho matlafatsoa haholo ke Moea oa hae mothong oa kahare, ka ho ea ka menono ea letlotlo la hae, hore Kriste a tle a ahe lipelong tsa lona ka tumelo, le tsitse, le be le tiee leratong.
Ka tsela ena le tla tseba ho utloisisa, ‘moho le bahalaleli bohle, seo bophara, bolelele, bophahamo le botebo ba lerato la Kriste bo leng sona, le ho tseba lerato la hae le phahametseng kutloisiso eohle, le tle le tlale ho phetheha hohle ha Molimo.
Ho eena eo matla a hae, ka ho sebetsa ka ho rona, a ka etsang tse fetang hole tseo re ka li kopang kapa tseo re ka li hopolang, ho eena letlotlo Kerekeng le ho Kriste Jesu, melokong eohle, ka mehla le mehla! Amen.
PESALEMA 32
LEFATŠE LOHLE LE TLETSE MOHAU OA MORENA.
Etsetsang Morena litlatse, lona ba lokileng,
ba lokelang ho mo rorisa ke ba pelo li ntle.
Bokang Morena ka harepa,
le mo letsetse cithara.
Hobane lentsoe la Morena ke la ‘nete,
le mesebetsi eohle ea hae e tiile.
O rata toka, o hloka leeme,
lefatše lohle le tletse mohau oa Morena.
Athe morero oa Morena o tiile kamehla,
mehopolo ea pelo ea hae ke ea meloko le meloko.
Ho lehlohonolo sechaba
seo Morena e leng Molimo oa sona,
seo a ikhethetseng sona ho ba lefa la hae.
Mahlo a Morena a holim’a ba mo tšabang,
ba tšepileng mohau oa hae,
hore a ba phemise lefu.
A ba baballele bophelo nakong ea tlala.
Ho baloa Evangeling e halalelang e ngotsoeng ke Luka. (12,49-53)
“Ha kea tla ho tlisa khotso lefatšeng empa karohano.”
Ka nako eo, Jesu a re ho barutuoa ba hae: Ke tlile ho akhela mollo lefatšeng, ‘me takatso ea ka ke efe ha e se hore o tuke. Ke na le ho hlatsuoa, ‘me ke tšoenyeha hakakang ho fihlela hlatsuo eo e be e phethahala.
Ana le hopola hore ke tlisitse khotso lefatšeng? Ke re ho lona: Che, empa karohano. Hobane, ho tloha nakong ena, ba bahlano ba ka tlung e le ‘ngoe ba tla arohana, ba bararo ba fapane le ba babeli, ba babeli, le ba bararo. Ba tla arohana: ntat’a motho le mor’a hae, le mora le ntat’ae; ‘m’a le morali, le morali le ‘m’ae; matsal’a motho le ngoetsi ea hae, le ngoetsi le matsal’a eona.
