Moeletsi oa Basotho Beke ea 29 Har’a selemo
‘Mantaha
Ho baloa Lengolong la Moapostola Paulosi ho Ba-Efese. (2,1-10)
“O boetse o re phelisitse hammoho le Kriste, o re lulisitse maholimong ho Eena.”
Bana beso! Lona le ne le shoele ka baka la litšito le libe tsa lona. Ka nako e fetileng le ne le phela ka ho ea ka mokhoa oa lefatše lena, le le tlasa morena oa ‘muso o sebakeng, e leng moea o ntseng o sebetsa joale har’a ba sa lumelang.
Le rona bohle, nakong e fetileng re ne re le joalo. Re ne re phela ka ho ea ka maikutlo a rona a botho, re latela litakatso tsa botho le likhopolo tsa rona. Ka tlhaho le rona re ne re lokeloa ke khalefo joaloka ba bang.
Empa Molimo ea mohau o moholo, ka baka la lerato le leholo leo a re ratileng ka lona, ha re ne re shoele ke libe, o boetse o re phelisitse hammoho le Kriste, o le pholositse mahala, ‘me o re tsositse le eena, o re lulisitse maholimong ho Kriste Jesu.
Ka hona Molimo o ratile ho bontša, bakeng la mengoaha eohle, menonohali ea mohau oa hae, o pakoang ke lerato la hae ho rona, ho Kriste Jesu. Ke ka mohau ha le pholositsoe ka tumelo. Ha lea pholoha ka matla a lona, empa pholoho ea lona ke mpho ea Molimo. Le teng ha se ka mesebetsi ea lona, e se re ha e-ba le ea ka ithorisang. Re hlile re tholoana ea mosebetsi oa hae; ho Kriste Jesu re bopetsoe mesebetsi e metle eo Molimo a e hlophetseng hore re e phethe.
PESALEMA 99
KE MORENA EA RE ENTSENG, ‘ME RE BA HAE.
Etsetsang Morena litlatse,
lona mafatše ‘ohle,
tloong pel’a hae ka mehoo ea thabo,
sebeletsang Morena ka nyakallo.
Tsebang hore Morena ke eena Molimo,
ke eena ea re entseng ‘me re ba hae;
re sechaba sa hae
le mohlape oa makhulo a hae.
Kenang menyakong ea hae ka teboho,
le mabaleng a hae ka lithoko;
mo leboheng,
le boke lebitso la hae.
Morena o molemo, mohau oa hae ke o sa feleng,
‘nete ea hae ke ea kamehla le mehla.
Ho baloa Evangeling e halalelang e ngotsoeng ke Luka. (12,13-21)
“Tseo u li lokositseng e tla ba tsa mang?”
Ka nako eo, motho e mong ea letšoeleng a re ho Jesu: Moruti, bolella ngoan’eso hore a arolelane lefa le ‘na. Empa eena a mo araba, a re: Monna, ke mang ea mpehileng moahloli kapa moaroleli holim’a lona na?
Eaba o re ho bohle: Hlokomelang, le pheme bokhonatha bohle; hobane, leha motho a ka rua joang kapa joang, bophelo ha bo tsoe linthong tseo a nang le tsona.
A ba bolella papiso ena, a re: Tšimo ea motho e mong oa morui e ne e behile lijo tse ngata haholo. ‘Me o n’a inahana, a re: Ke tla etsa joang? Hobane ke hloka moo nka bolokelang lijo tsa ka teng. Joale a re: Ke tla etsa sena: Ke tla qhaqholla meliko ea ka, ke ahe e meholo ho feta; ‘me moo ke tla bokella tsohle tse ‘meletseng le maruo ‘ohle a ka. Ke be ke re ho moea oa ka: Moea, u na le maruo a mangata a bokeletsoeng lilemo tse ngata ngata; ak’u phomole joale, u je, u noe, u ithabele!
Empa Molimo a re ho eena: Sethoto! Ka bosiu bona bona ho tla latoa moea oa hau. Joale tseo u li lokisitseng e tla ba tsa mang na? O joalo ea ipokellelang matlotlo, empa eo e seng morui mahlong a Molimo.
