Nthabeleng Seitlheko Bana ba banana ba lokela ho tšehetsoa ka litsela tsohle ho sa natsoe boleng le chebahalo ea bona, seo se ka thusa ho aha sechaba se nang le boitšepo. Litaba tsena li boletsoe ke mothehi oa Pheku Foundation, Sechaba Pheku ka la 7 Mphalane monongoaha.
O re mosebetsi o moholo ke ho arabela qholotso e tobileng bana ba banana ba tlokotsing, ea ho hloka mesangoana ea boitlhoekiso nakong eo ba leng linakong tsa bona. O re ketso ena ke ho aha bokamoso ba ngoan’a ngoanana, kholo e ntle le boitšepo ka linako tsohle.
O itse ha ba rate bana ba ka sulafalloang ke matsatsi a tlholeho ao ho seng mang kapa mang ea ikhethelang ona, ka hona motho o lokela ho tsoelapele ka mabaka a hae nakong ea boitlhoekiso. Ke bana ba 11 ba uneng molemo oa mesangoana ea boitlhoekiso le sesepa.
O re qaleho ea ho ea linakong ke nako eo ka eona banana ba lokelang ho ba makhethe kaha ba fetohela mokhoeng o mocha oa bophelo ba boroetsana. O re sena se ba thusa ho ikemela hobane ba fuoa thuto ka mekhoa e nepahetseng ea boitlhoekiso.
A re limpho tsena li bohlokoa le tikoloho e lokela ho nka boikarabello ba ho hlokomela bana ba banana hore ba tsebe ho hola ka tsela e nepahetseng. A tsoelapele ho bontša hore bofuma ke e ‘ngoe ea lintho tse etsang hore bana ba qetelle ba nyahlatsa le sekolo hobane ka linako tse joalo ba se na seo ba ka se sebelisang ho itlhoekisa.
Khunoane Seroki eo bana ba hae ba uneng molemo ona, o itse nakong eo moroetsana a bonang linako tsa hae ke nako e kholo ea phetoho ea bophelo eo ka eona a kopanang le liqholotso tse ngata. A re bo-ntate ba lokela ho tšehetsa bana ba banana haholo ba tlokotsing ho bontša tšireletso ho bona.
A re mesangoana ena e ba thusa hore ha bana ba filoe e meraro e be e le batsoali ba tlatsetsa ka e meng, ‘me ha ba iphumana ba eba le khaello, ba se ba lula ba ba hlophetse.
H’a phethela o lebohile Pheku Foundation ka ketso ena eo a supileng e fetotse bophelo ba bana ba banana ba bangata, hobane ha ho sa na bana ba lofang sekolo hobane ba se na lisebelisoa.
