Moeletsi oa Basotho Beke ea 23 har’a selemo
Labobeli
Ho baloa Lengolong la Pele la Moapostola Paulosi ho Ba-Korinthe. (6,1-11)
“Motho o ee a ise ngoan’ abo khotla, le hona e le ka pele ho bahedene!”
Bana beso! Ha e mong oA lOna a e-na le nyeoe le e mong, ha a tšabe ke’ng ho ea ahloleloa ke ba sa lokang, e seng ke bahalaleli? Ana ha le tsebe hore bahalaleli ba tla ahlola lefatše? ‘Me ha eba lefatše le tla fela le ahloloe ke lona, ha lea lokela joang ho ahlola litaba tse nyenyane na? Ana ha le tsebe hore re tla ahlola manyeloi? Linthong tsa lefatše lena ho re lokela hakakang!
Ka baka leo, ha le e-na le nyeoe litabeng tsa lefatše, le ka ea joang ho bao e seng ba Kereke hore ba le ahlolele. Ke rialo ka ho le hlabisa lihlong. Na ka ‘nete ke ha ho le ea mong ea leng bohlale har’a lona, ea ka ahlolelang bana babo, na?
Empa motho o ee a ise ngoan’abo khotla, le hona e le ka pele ho bahedene! Ruri e se e le molato o moholo ho lona ha le e-na le linyeoe hara lona. Na ha le mpe la lumela ke’ng ho etsoa hampe? Na ha le mpe la lumela ke’ng hore le senyeheloe? Athe ke lona ba etsang ba bang hampe, ba ba senyetsang, ‘me le hona e le bana babo lona. Ana ha le tsebe hore ba sa lokang ba ke ke rua ‘muso oa Molimo?
Le se ke la ithetsa: Batho bao e leng lihlola kapa ba sebeletsang melimo ea bohata, leha e le bafebi kapa ba inehetseng bokhopo le basodoma, leha e le masholu, makhonatha kapa matahoa, baetselletsi kapa ba utsoetsang ba bang, bana kaofela ba ke ke ba rua ‘muso oa Molimo.
Ba bang har’a lona ba kile ba e-ba joalo: empa le hloekisitsoe, le halalelitsoe, le entsoe ba lokileng ka lebitso la Morena Jesu Kriste le ka moea oa Molimo oa rona.
PESALEMA 149 (1-4.5-6 le 9. R. 4)
MORENA O KHAHLILOE KE SECHABA SA HAE.
Binelang Morena sefela se secha,
le mo roke phuthehong ea metsoalle ea hae.
Israele a ke a ithabele ka ‘Mopi oa hae,
bana ba Sione ba nyakalle ka khosi ea bona.
Ba ke ba rorise lebitso la hae ka mehobelo,
ba mo roke ka meropana le harepa;
hobane Morena o khahliloe ke sechaba sa hae,
o sitsa ba hlophehileng ka pholoho.
Metsoalle ea hae e tla ba motlotlo,
e hooe ka thabo ha e itihela ka pele ho eena;
e phafe Molimo ka lentsoe le phefa:
ke bona boitumelo ba metsoalle eohle ea hae.
Ho baloa Evangeling e halalelang e ngotsoeng ke Luka. (6,12-19)
“A qeta bosiu bohle a ntse a rapela. A khetha ba leshome le metso e ‘meli, bao a ileng a ba bitsa baopostola.”
Ka nako eo, Jesu a ikela thabeng ho ea rapela ‘me a qeta bosiu bohle a ntse a rapela Molimo. Eitse ha le chaba, a bitsa barutuoa ba hae, ‘me har’a bona a khetha ba leshome le metso e ‘meli, bao a ileng a ba bitsa baapostola, e leng Simone, eo a mo rehileng Peterosi, le Andreas ngoan’abo, Jakobo le Joannes, Filipi le Bartholome, Matheus le Thomas, Jakobo mor’a Alfea le Simone ea bitsoang Mochesehi, Juda mor’a Jakobo le Judase Iskariota, eo e bileng moeki.
Eaba o theoha le bona, a ema motsitseng le bongata ba barutuoa ba hae, le letšoele le leholo la batho ba tsoang Judea eohle le Jerusalema le lebopong la leoatle la Tire le la Sidone, ba neng ba tlile ho mamela le ho folisoa maloetse a bona. Ba tšoenngoang ke meea e litšila ba ne ba folisoa. Letšoele lohle le ne le rata ho mo ama hobane matla a tsoang ho eena a ne a folisa bohle
