Moeletsi oa Basotho Beke ea 21 har’a selemo
Labotšelela
Ho baloa Lengolong la Pele la Moapostola Paulosi ho Ba-Korinthe, (1,26-31)
“Molimo o khethile tse eisehang lefatšeng.”
Bana beso! A le keng le hlahlobisise pitso ea lona, ka ha ho se ba bangata ba nang le bohlale ba lefatše, ho se ba bangata ba linatla, ho se ba bangata ba mali a borena. Empa Molimo o khethile tseo e leng bothoto lefatšeng ho tsietsa ba bohlale, tse fokolang lefatšeng ho tsietsa tse matla.
Tse eisehang le tse khesehang lefatšeng, tseo e seng letho, ke tsona tseo Molimo a ikhethetseng tsona ho fenya tseo e leng letho, e le hore ho se be motho ofe kapa ofe ea ka ithorisang pel’a hae.
‘Me ke ka eena, lona le leng ho Kriste Jesu, eo Molimo a re fileng eena hore e be bohlale ba rona, tokafatso, khalaletso le topollo ea rõna, hore joaloka ha ho ngoliloe, ea ithorisang a ithorise ka Morena.
PESALEMA 32 (12-13.18-21. R. 12)
HO LEHLOHONOLO SECHABA SEO MORENA A IKHETHETSENG SONA HO BA LEFA LA HAE.
Ho lehlohonolo sechaba
seo Morena e leng Molimo oa sona,
seo a ikhethetseng sona ho ba lefa la hae.
Morena o talima a le maholimong,
o bona bana bohle ba batho.
Mahlo a Morena a holim’a ba mo tšabang,
ba tšepileng mohau oa hae,
hore a ba phemise lefu,
a ba baballele bophelo nakong ea tlala.
Meea ea rõna e lebella Morena,
ke eena thuso le thebe ea rona.
Pelo tsa rona li ithabela ka eena,
hobane re tšepile lebitso le halalelang la hae.
Ho baloa Evangeling e halalelang e ngotsoeng ke Matheus. (25,14-30)
“U tšepahetse linthong tse seng kae, kena thabong ea morena oa hao.”
Ka nako eo, Jesu a bolella barutuoa ba hae papiso ena: ‘Muso oa Maholimo o tšoana le motho ea etelang hole, ea ileng a bitsa bahlanka ba hae ‘me a ba siela maruo a hae. A abela e mong chelete e litalenta li hlano, e mong tse peli, e mong e le ‘ngoe, e mong le e mong ka ho ea ka mahlale a hae. Motho eo a nt’o tsamaea.
Ea amohetseng litalenta tse hlano a ikela, a ea hoeba ka tsona, ‘me a phaella ka tse hlano. Ka mokhoa o joalo, le eena ea neng a amohetse tse peli a phaella ka tse peli. Athe ea neng a amohetse e le ‘ngoe a ea cheka fatše, ‘me a epela chelete ea mong’a hae.
Kamor’a nako e telele, morena oa bahlanka bao a khutla, ‘me a hlahloba tšebetso ea bona. Joale ea neng a amohetse litalenta tse hlano a atamela, a tlisa litalenta tse ling tse hlano, a re: Morena, u ile ua nkabela litalenta tse hlano; bona, ke phaelletse ka tse ling tse hlano. Morena oa hae a re ho eena: Ke hantle mohlanka ea lokileng ‘me ea tšepahalang. Kaha u tšepahetse linthong tse seng kae, ke tla u beha holim’a tse ngata; kena thabong ea morena oa hao.
Le eena ea neng a amohetse litalenta tse peli, a atamela ‘me a re: Morena, u ile ua nkabela litalenta tse peli: bona ke phaelletse ka tse ling tse peli. Morena oa hae a re ho eena: Ke hantle, mohlanka ea lokileng ‘me ea tšepahalang. Kaha u tšepahetse linthong tse seng kae, ke tla u beha holim’a tse ngata; kena thabong ea morena oa hao.
Athe ea neng a amohetse talenta e le ‘ngoe, a atamela ‘me a re: Morena, kea tseba hore u motho ea thata: u kotula moo u sa kang ua jala teng, ‘me u bokella moo u sa kang ua hasa teng. Ka baka la ho tšaba, ka ea, ka epela talenta ea hau mobung; ke eo, u na le seo e leng sa hau.
Mong’a hae a fetola, a re: Mohlanka e mobe, ‘me ea botsoa, u n’u nts’u tseba hore ke kotula moo ke sa kang ka jala teng, ‘me ke bokella moo ke sa kang ka hasa teng. Ha ho le joalo, u n’u tšoanetse ho beha chelete ea ka bankeng, etlere mohla ke khutlang, ke e amohele ‘moho le phaello ea eona. Ka baka leo, mo amoheng talenta ea hae, ‘me le e nehe ea nang le litalenta tse leshome. Hobane ea nang le letho o tla fuoa ‘me a ateloe: empa ea se mang letho o tla amohuoa le seo e kang o na le sona. Ha e le mohlanka eo ea se nang thuso, mo lahleleng lefifing le kantle, moo ho tla ba teng lillo le litsikitlano tsa meno.
