Itumeleng Nthunya Beke ea 20 har’a selemo
Sehopotso sa Bernard ea Halalelang
Labobeli
Ho baloa Bukeng ea Moprofeta Ezekiele. (28,1-10)
“Leha u le motho feela, e seng Molimo, o ikhopola u le Molimo.”
Lentsoe la Morena le ile la mphihlela, la re: Mor’a motho e-re ho khosana ea Tire: Ke sena seo Morena Molimo a se bolela: U tletse boikhohomoso ‘me u itse:
Ke Molimo, ke lutse se ka molimo, ke pota-potiloe ke maoatle. Leha u le motho feela, e seng Molimo, u ikhopola u le Molimo.
Ebe u hlalefile joaloka Daniele, ‘me ha ho letho le u siretseng! Ka bohlale le ka masene a hau, u ipokeletse ka maruo, u tlatsitse lipolokelo tsa hau ka gauda le silvera. Ka bohlale bo boholo ba hau khoebong, u atisitse maruo a hau, ka baka la maruo a hau u tletse boikakaso.
Ka baka leo, ke sena seo Morena Molimo a se bolelang: Erekaha u ikhopola u le Molimo, ke tla u bitsetsa balichaba, sechaba se sehloho ho feta tse ling kaofela; ba tla tsomula sabole, ba felise botlenyana ba bohlale ba hau, ba silafatse khanya ea hau. Ba tla u lahlela sekoting, u tla shoa lefu la matsoho, u nts’u pota-potiloe ke maoatle.
Ebe u tla ‘n’u re: Ke Molimo, ha u talimane le babolai ba hau? Che, ha u molimo, u motho, ha u oela liatleng tsa ba u timetsang. U tla shoa lefu le lihlong ka matsoho a balichaba, hobane ke buile, ho rialo Morena Molimo.
PESALEMA (Deut 32,26-28.30.35-36. R. 39)
KE LAOLA LEFU LE BOPHELO.
Ke itse: Nka be ke ba putula,
ke hlakola lebitso la bona har’a batho,
hoja ha ke tšabe boikhohomoso ba lira;
ba ba loantšang ba se tsohe ba ithetsa.
Ba re: “Ke matsoho a rona a sebelitseng hona,
Morena eena ha a etsa letho.”
Ke sechaba se se nang merero e tsitsitseng,
ke batho ba hlokang kelello.
Ho tla joang hore batho ba sekete
ba lelekisoe ke a le mong,
le ba likete tse leshome ba qhaloe ke ba babeli,
ha e se hobane Lefika la bona le ba rekisitse,
Morena o fane ka bona.
Hobane letsatsi la timelo ea bona le haufi.
‘me tse lokelang ho ba hlahela li tla ka potlako
Mohla Morena a ahlolelang sechaba sa hae
o tla qenehela bahlanka ba hae.
Ho baloa Evangeling e halalelang e ngotsoeng ke Matheus. (19,23-30)
“Ho bonolo hore kamele e fete ka leihlo la nale, ho e-na le hore morui a kene ‘musong oa maholimo.”
Ka nako eo, Jesu a re ho barutuoa ba hae: Ruri kea le bolella, morui o tla kena ‘musong oa maholimo ka thata. Ke le bolella hape, ke re ho bonolo hore kamele e fete ka leihlo la nale, ho e-na le hore morui a kene ‘musong oa maholimo. Ha barutuoa ba utloa tsena ba makala haholo, ba re: Ha ho le joalo, ke mang ea ka pholohang na? Empa Jesu a ba talima, a re ho bona: Ha e le batho, hona hoa ba sita; empa ho Molimo ha ho letho le mo sitang.
Joale Peterosi a re ho Jesu: Bona, rona re tlohetse tsohle, ‘me re u latetse. Joale re tla ba le eng? Jesu a re ho bona: Ruri kea le bolella, lona ba ntatetseng: mohla nchafatso ea tsohle, ha Mor’a motho a lutse teroneng ea hae ea letlotlo, le lona le tla lula literoneng tse leshome le metso e ‘meli, le ahlole meloko e leshome le metso e ‘meli ea Israele.
‘Me mang le mang ea tlohetseng matlo, kapa bana babo, kapa likhaitseli, kapa ntat’ae, kapa ‘m’ae kapa mosali, kapa bana, kapa masimo, ka baka la lebitso la ka, o tla buseletsoa ha lekholo ‘me a be le kabelo bophelong bo sa feleng. ‘Me ba bangata ba pele e tla ba ba morao, le ba morao e tla ba ba pele.
