Moeletsi oa Basotho Beke ea 18 har’a selemo
Laboraro
Ho baloa Bukeng ea Moprofeta Jeremia. (31,1-7)
“Ha e sa le ke u ratile.”
Mohlang oo, ho rialo Morena, ke tla ba Molimo oa meloko eohle ea Israele, ‘me eona e tla ba sechaba sa ka. Ke sena seo Morena a se bolelang: Sechaba se phonyohileng bohaleng ba sabole se fumane mohau felleng, ha Israele a n’a leba moo a tla phomola teng. Morena a iponahatsa ho eena a sa le hole, a re: Ha e sa le ke u ratile, ka baka leo ke u boloketse mohau oa ka.
Ke tla u tsosa bocha, ke u ahe, u tiee, uena moroetsana, Israele. U tla boela u letsa meropa ea hau ea mokete, u tsamaee u etsa metjeko ea thabo. U tla boela u lema morara thabeng tsa Samaria, balemi ba oona ba tla o lema, ‘me ba itjelle oona.
Ho tla tla letsatsi, leo ka lona balebeli ba tla hoeletsa ba le thabeng ea Efraime, ba re: Emang, a re nyoloheleng Sione, ho Morena, Molimo oa rona!
Etsetsang Jakobo litlatse tsa nyakallo, opelang sechaba se okametseng tse ling mahofi. Hooang, rokang, le re: Morena o pholositse sechaba sa hae, masalla a Israele.
PESALEMA (Jer 31,10-13. R. 10)
PHUTHA SECHABA SA HAU SE QHALAKANENG, MORENA, U SE LISE JOALOKA MOLISA A LISITSE MOHLAPE OA HAE.
Lona lichaba, mamelang lentsoe la Morena
le le phatlalletse lihleke-hleke tse hole.
Le re: Ea qhalantseng Israele oa mo phutha.
‘me o mo lisa joaloka molisa
a lisitse mohlape oa hae.
Hobane Morena o lopolotse Jakobo,
o mo namoletse matsohong a ea mo fetang ka matla.
Ba tla tla ka litlatse tsa thabo thabeng ea Sione,
ba tla mathela ho tse melemo tsa Morena,
e leng koro, veine le oli,
likonyana le manamane.
Ke moo baroetsana ba tla thabela metjeko,
bahlankana le maqheku ba nyakalle.
Ke tla fetola bofifi ba bona thabo,
ke ba ttšelise, ke ba thabise bohlokong ba bona.
Ho baloa Evangeling e halalelang e ngotsoeng ke Matheus. (15,21-28)
“Mosali tumelo ea hao e kholo!”
Ka nako eo, Jesu a tloha moo, a ea seterekeng sa Tire le Sidone. Ke ha mosali e mong oa Mokanana, ea tsoang tikolohong eo, a hooa, a re: Ak’u nkhauhele, Morena, Mor’a Davida! Morali oa ka o tšoenngoa habohloko ke modemone. Empa Jesu a se ke a araba letho. Barutuoa ba hae ba atamela, ba mo kopa, ba re: E-re a tsamaee, hobane o hoeletsa a re setse morao.
Jesu a araba, a re: Ke ronngoe feela linkung tse lahlehileng tsa ntlo ea Israele. Joale mosali a tla, a mo khumamela, a re: Morena, ak’u nthuse! Jesu a mo araba, a re; Ha se hantle ho nka bohobe ba bana le ho bo akhella lintjanyana. Mosali a re: E, Morena; empa le tsona lintjanyana li ee li je makumane a oang tafoleng ea beng ba tsona. Joale Jesu a mno araba, a re: Mosali, tumelo ea hau e kholo: u etsetsoe joaloka ha u lakatsa. ‘Me morali oa hae a fola ho tloha motsotsong oona oo.
