Moeletsi oa Basotho Beke ea 18 har’a selemo
‘Mantaha
Ho baloa Bukeng ea Moprofeta Jeremia. (28,1-17)
“Hanania, ha ua rongoa ke Morena, empa ka bo-uena u tšepisitse sechaba sena ka mashano.”
Ka selemo sa bone sa puso ea Sedekia, khosi ea Jado khoeling ea bohlano, moprofeta Hanania, mor’a Azzura, oa Gibeone, a bua le ‘na ka Tempeleng ea Morena, pontšeng ea baprista le sechaba kaofela, a re: Ke sena seo Morena oa makhotla, Molimo oa Israele a se bolelang, ke robile joko ea khosi ea Babilone.
Kamor’a lemo tse peli ke tla khutlisetsa qalong ena thepa eohle ea Tempele ea Morena, eo Nebukadnezare, khosi ea Babilone, a e nkileng qalong ena, a e isa Babilone. Hape, ke tla khutlisetsa qalong ena Jehoiakime, khosi ea Juda, le bohle ba Juda ba isitsoeng kholehong Babilone, ho rialo Morena; hobane ke tla fela ke robe joko ea khosi ea Babilone.
Ke ha moprofeta Jeremia a fetola moprofeta Hanania, pontšeng ea baprista le sechaba sohle se ka Tempeleng ea Morena. Moprofeta Jeremia a re: A ho be joalo, Morena a ke a etse joalo. Morena a ke a phethahatse mantsoe a boprofeta ba hau, ‘me a khutlisetse qalong ena thepa eohle ea Tempele e isitsoeng Babilone le bohle ba kholehong.
Feela mamela hantle lentsoe leo ke tla le bolela moo uena le sechaba kaofela le utloang. Baprofeta ba bileng teng ho tloha khale, pele ho rona le uena, ba ‘nile ba profetela linaha tse ngata le mebuso e matla hore lintoa, tlala le mafu a seoa li tla ba teng. Athe ha e le moprofeta ea profetang tsa khotso, ke ha feela polelo ea moprofeta eo e ka phethahala, a tlang ho tsejoa e le ea ronngoeng ke Morena ruri.
Eaba moprofeta Hanania o tlosa joko eo moprofeta Jeremia a neng a e jere mahetleng, ‘me a e roba. Hanania a nt’o bua pontšeng ea sechaba kaofela, a re: Ke sena seo Morena a se bolelang: Ka mokhoa o tšoanang, kamor’a lemo tse peli, ke tla roba joko eo Nebukadnezare, khosi ea Babilone, a e jarisitseng lichaba tsohle mahetleng. Moprofeta Jeremia eena a ikela.
Eitse hoba Hanania a tlose joko mahetleng a moprofeta Jeremia, ‘me a e robe, lentsoe la Morena le ile la fihlela Jeremia, a re:
Tsa m’o bolella Hanania, u re: Ke sena seo Morena a se bolelang: U robile joko e entsoeng ka sefate, empa bakeng sa eona u iketsetsa ea tšepe. Hobane ke sena seo Morena oa makhotla, Molimo oa Israele, a se bolelang: Ke se ke beha joko ea tšepe mahetleng a lichaba tsena kaofela, li tle li sebeletse Nebukadnezare, Khosi ea Babilone, ‘me li tla ‘ne li mo sebeletse; ke mo neha esita le liphoofolo tsa naha.
Moprofeta Jeremia a nt’o bolella moprofeta Hanania a re: Mamela hantle, Hanania. Ha ua rongoa ke Morena; empa ka bo-uena u tšepisitse sechaba sena ka mashano. Ka baka leo, Morena o bua joana: Ke se ke tla u hlakola lefatšeng: monongoaha u tla shoa, hobane u rutile batho ho fetohela Morena. Ke ha, selemong sona seo, ka khoeli ea bosupa, moprofeta Hanania a e-shoa.
PESALEMA 118 (29.43.79.80.95.102. R. 68)
NTHUTE THATO EA HAU, MORENA,
Nqobise tsela ea thetso,
u ntšitse ka Molao oa hau.
U se ke ua amoha molomo oa ka
polelo e nang le ‘nete,
hobane ke tšepile likahlolo tsa hau.
Ba u tšabang, ba bile ba tseba litemoso tsa hau,
ba ke ba tle ho ‘na,
pelo ea ka e ke e phethe thato ea hau,
hore ke tle ke se ke ka tlontlolleha.
Ba khopo ba laletse ho ntimetsa,
ke mpa ke utloisisa litemoso tsa hau.
Ha kea koekoetla likahlolo tsa hau,
hobane ke uena ea nthutileng tsona.
Ho baloa Evangeling e halalelang e ngotsoeng ke Matheus. (14,13-21)
“A boka a lelaletse leholimong, a nt’o ngoatha mahobe, a neha barutuoa; bona ba a fa matšoele.”
Ka nako eo ha Jesu a utloa pii ea Joannes Mohlatsoi a tloha moo ka sekepana, a ikela thoko, naha-thote. Matšoele h’a utloa, a mo latela ka maoto a e-tsoa metseng. Ha Jesu a e-tsoa sekepaneng, a bona boieane ba batho; a ba utloela bohloko, a ba a folisa bakuli ba bona.
Ha e se e le mantsiboea, barutuoa ba hae ba atamela ho eena, ba re: Mona ke naha-thote, nako e se e ile; ak’u qhale batho, hore ba tle ba e’o ithekela lijo metseng. Jesu a re ho bona: Ha ho hlokahale hore ba ee; ba fepeng e le lona! Ba re ho eena: Mona ha re na letho, ha e se mahobe a mahlano le litlhapi tse peli. A re: Ntlisetseng tsona mona.
Eare hoba a laele matšoele ho lula joang, a nka mahobe a mahlano le litlhapi tse peli, a boka a lelaletse leholimong, a nt’o ngoatha mahobe, a a neha barutuoa; barutuoa bona ba a fa matšoele.
Bohle ba e-ja, ba khora, ‘me ha bokelloa marathana a setseng, a etsang liroto tse leshome le metso e ‘meli tse tletseng. Ba jeleng e ne e le banna ba ka bang likete tse hlano, ho sa baloe basali le bana.
