Moeletsi oa Basotho Beke ea 17 har’a selemo
Labohlano
Ho baloa Bukeng ea Moprofeta Jeremia (26, 1-9)
“Sechaba kaofela se tlile ho khumamela Morena.”
Qalehong ea puso ea Jehoiakime, mor’a Josia, khosi ea Juda, lentsoe le ileng la fihlela Jeremia le e-tsoa ho Morena, ke lena: Ke sena seo Morena a se bolelang: Ema lebaleng la Tempele ea Morena, u bue le batho ba metse eohle ea Juda ba tlileng ho khumamela Morena ka Tempeleng ea hae. U ba bolelle tsohle tseo ke u laetseng tsona, u sa fokotse letho. Mohlomong ba tla mamela, e mong le e mong a khutle metsamaong e mebe ea hae ke tle ke fetole morero oa ka oa ho otla ka baka la liketso tse mpe tsa bona.
Joale u re ho bona: Ke sena seo Morena a se bolelang: Ha le sa ‘mamele, le sa phele ka ho ea ka Molao oo ke le behetseng oona, ha le sa mamele lipolelo tsa bahlanka ba ka, baprofeta, bao ke sa khaotseng ho ba romela ho lona leha le sa ba mamele, ke tla etsa Ntlo ena joaloka Shilo, motse ona ke o etse o rohakehileng lichabeng tsohle tsa lefatše.
Baprista, baprofeta le sechaba kaofela ba utloa Jeremia a bolela tsena ka tlung ea Morena. Eitse hoba a qete ho bolela sohle seo Morena a neng a mo laetse ho se bolella sechaba kaofela, eaba baprista le baprofeta baa mo tšoara, ba re: U tla bolaoa, Ke’ng, ha u profeta lebitsong la Morena, u re: Ntlo ee e tla ba joaloka Shilo motse oo e be lesupi, o hloke baahi? Sechaba kaofela sa bokanela Jeremia ka Tempeleng ea Morena.
PESALEMA 68 (5.8-10.14. R. 14)
NKARABE, MOLIMO, KA HO EA KA MOHAU OA HAO O MOHOLO.
Ba ntlhoileng ntle le lebaka
ba feta liqoba tsa moriri oa hloho ea ka ka palo.
Ba matla ho mpheta, ba nqosang feela-feela.
Nka busetsa joang seo ke sa se utsoang?
Ke ka baka la hao ke mamellang mahlapa,
ke aparetsoeng ke lihlong.
Hobane chesehelo ea ntlo ea hao e nqetile,
le mahlapa a ba u hlapaolang a holim’a ka.
Ha e le ‘na, ke lebisa thapelo ea ka
ho uena, Morena, ka nako ea khauhelo.
Nkarabe, Molimo, ka ho ea ka mohau oa hao o moholo
le ho ea ka pholoho ea hao ea ‘nete.
Ho baloa Evangeling e halalelang e ngotsoeng ke Matheus. (13, 54-58)
“Na ha se eena mora oa ‘metli oa mapolanka? O li nkìle kae tsena kaofela?”
Ka nako eo, Jesu a fihla motseng oa habo, a ruta batho tlung ea thapelo. Ba ne ba tsota ba re: bohlale bona le mehlolo ena, enoa o e nkile kae? Na ha se eena mor’a oa ‘metli oa mapolanka? Na ‘ma’e ha se ea bitsoang Maria, le bana babo ha se Jakobo, Josefa, Simone le Juda? Le likhaitseli tsa hae tsohle ha li moo har’a rona? Ha ho le joalo, o li nkile kae tsena kaofela?
Ba ne ba mpa ba khopiseha ke eena. Empa Jesu a re ho bona: Ha ho moo Moprofeta a hlompholloang haese motseng oa habo le lapeng labo. ‘Me ka baka la ho se lumele ha bona, ha ka etsa mehlolo e mengata moo.
