Moeletsi oa Basotho Beke ea 17 har’a selemo
Laboraro
Sehopotso sa Ignatius ea Halalelang oa Loyola, Moprista
Ho baloa Bukeng ea Moprofeta Jeremia. (15, 10.16-21)
“Ke’ng ha bohloko ba ka bo sa fele? Ha u ka oa khutla mekhoeng, ke tla u khutlisetsa tšebeletsong ea ka.”
Ke malimabe hakaakang, ‘m’e, ha u ntsoetse ke le motho oa litsekisano, ea qosanang le naha ee eohle! Ha kea alima leha e le ho alimana ka letho; empa bohle ba nthohaka.
Ha lipolelo tsa hau li fihla ho ‘na, ke ile ka li ja: li ile tsa nkhahlisa ‘me tsa thabisa pelo ea ka, hobane ke bitsoa ka uena, Morena Molimo oa makhotla. Ha kea ka ka ithabela ka ho lula mokhatlong oa basomi; empa ka ha letsoho la hau le holim’a ka, ke ile ka itulela ke inotsi, u ntlatsitse khalefo.
Ke’ng ha bohloko ba ka bo sa fele, ke’ng ha leqeba la ka le sa fole, le hana ho phekoleha? Na u fela u ka ba ho ‘na joaloka nokana e psheleng, e se nang metsi ha motho a a batla?
Morena a araba joana: Ha u ka ua khutla mekhoeng, ke tla u khutlisetsa tšebeletsong ea ka. Ha u ka ua khetha ntho e ntle ho e mpe, u tla ba molomo oa ka hape. Sechaba se tla khutlela ho uena, e seng uena u khutlele ho sona.
Ho thiba sechaba sena, ke tla u etsa lerako la koporo le ke keng la sisinngoa ke letho. Ba tla u loantša, empa ba sitoe ho u hlola, hobane ke tla ba le uena ho u pholosa le ho u namolela, ho rialo Morena. Ke tla u namolela matsohong a ba babe, ke u ntše liatleng tsa ba sehloho.
PESALEMA 58
MOLIMO KE SETšABELO SA KA TSATSING LA MATšOENYEHO.
Ak’u ‘namolele lireng tsa ka, Molimo oa ka,
u nqobeletse ho ba mphutuhelang.
Ak’u ‘namolele ho ba etsang tse sa lokang,
u mpholose ho babolai.
Hobane ke bana ba ntaletse, ba matla ba ntikanetse,
leha ke sa etsa phoso kapa sebe, Morena.
Leha ke se na molato,
ba mathela moleng oa ntoa.
Uena matla a ka, ke shebile uena,
uena Molimo, u qhobosheane ea ka.
Molimo ea nkhauhelang oa nkhahlametsa,
Molimo o tla mpontša ho hloloa ha lira tsa ka.
Ha e le ‘na, ke tla binela matla a hau,
ke tumise mohau oa hau e sa le meso,
hobane u bile qhobosheane ea ka
le setšabelo sa ka tsatsing la matšoenyeho.
Ke tla u roka ka lifela, uena matla a ka;
uena Molimo, u qhobosheane ea ka,
u Molimo ea nkhauhelang.
Ho baloa Evangeling e halalelang e ngotsoeng ke Matheus. (13,44-46)
“A e’o rekisa tsohle tseo a nang le tsona, a reke tšimo eo.”
Ka nako eo, Jesu a re ho matšoele: ‘Muso oa maholimo o tšoana le letlotlo le patiloeng tšimong, leo ereng hoba motho a le fumane, a le pate, ‘me thabong ea hae a e’o rekisa tsohle tseo a nang le tsona, a reke tšimo eo.
Hape ‘Muso oa maholimo o tšoana le motho oa mohoebi ea batlang mabenyane a matle, eo ereng hoba a fumane le leng la bohlokoahali, a e’o rekisa tsohle tseo a nang le tsona, a le reke.
