Moeletsi oa Basotho Beke ea 17 har’a selemo
Sehopotso sa Maretha, Maria le Lazarus ba Halalelang
‘Mantaha
Ho baloa Bukeng ea Moprofeta Jeremia. (13,1-11)
“Sechaba se tla ba joaloka senyepa sena se se nang thuso.”
Morena o ile a bua joana ho ‘na: “Tsa m’o ithekela senyepa sa line, u itlame ka sona thekeng: u se k’a mp’a se ina metsing.” Eaba ke ithekela senyepa ho ea ka taelo ea Morena, ka itlama ka sona thekeng. Ke ha lentsoe la Morena le mphihlela khetlo la bobeli, le re: “Nka senyepa seo u se rekileng, se thekeng la hau, phakisa se ise nokeng ea Eufrate; u se pate teng lefarung la lefika.” Ka tsamaea ‘me ka se pata pel’a Eufrate, ka ho ea ka taelo ea Morena.
Kamor’a nako e telele, Morena a re ho ‘na: “Phakisa u khutlele Eufrate, u late senyepa seo ke neng ke u laetse ho se pata teng.” Ka tsamaea, ka ea Eufrate, ka cheka ‘me ka boela ka nka senyepa moo ke neng ke se patile teng. Empa senyepa se ne se senyehile, se se na thuso.
Eaba lentsoe la Morena lea mphihlela, le re: “Ke sena seo Morena a se bolelang: ka mokhoa o tšoanang ke tla senya boikhohomoso ba Juda, boikhohomoso bo boholohali ba Jerusalema. Sechaba sena se khopo, se hanang ho mamela lentsoe la ka, se ngangellang maikutlong a pelo ea sona, se salang melimo esele morao ho e sebeletsa le ho e khumamela, se tla ba joaloka senyepa sena se se nang thuso.
Hobane, joaloka ha senyepa se tlamelloa thekeng la motho ke ne ke tlameletse ho ‘na ntlo eohle ea Israele le ntlo eohle ea Juda, ho rialo Morena, e le hore e be sechaba sa ka, botumo ba ka, boithoriso le bokhabane ho ‘na, empa sa se ke sa mamela.
PESALEMA
U LEBETSE MOLIMO EA U TSOETSENG.
Ha u natse Lefika le u tsoetseng,
u lebetse Molimo ea u bopileng.
Morena o bone hoo, ‘me a halefa,
a lahla bara le barali ba hae.
A re: Ke tla ba patela sefahleho sa ka,
ke tle ke bone hore na ba tla fella kae,
hobane ke moloko oa bolotsana,
ke bana ba hlokang botšepehi.
Ba bakile poulelo ea ka ka seo e seng Molimo
ba nkhalefisitse ka melimo ea bona ea bohata.
Le ‘na ke tla baka poulelo ea bona
ka hoo e seng sechaba,
ke ba halefise ka sechaba se se nang kelello.
Ho baloa Evangeling e halalelang e ngotsoeng ke Matheus. (13,31-35)
“Tlhaku ea mosetareta e fetoha sefate seo linonyana tsa leholimo li ka tlang ho ahela makaleng a sona.”
Ka nako eo Jesu a behela matšoele papiso, a re: ‘Muso oa maholimo o tšoana le tlhaku ea mosetareta, eo motho a ileng a e nka, a e jala tšimong ea hae. Ke eona e leng nyenyane har’a lipeo tsohle; athe ha e se e hotse, e feta litlama tse ling ka boholo, e fetoha sefate seo linonyana tsa leholimo li ka tlang ho ahela makaleng a sona.
A ba bolella papiso e ‘ngoe hape, a re: ‘Muso oa maholimo o tšoana le tomoso, eo mosali a ileng a e nka, a e lubella phofong ea koro e tekanyo li tharo, ho fihlela hlama e lomoseha kaofela. Tseo tsohle Jesu a li bolella matšoele ka lipapiso, o ne a sa a bolelle letho ha e se ka lipapiso; ho tle ho phethahale se neng se ile sa boleloa ke moprofeta ha a re: Ke tla ahlamisa molomo ke bue ka lipapiso, ke phatlalatse tse patehileng ha esale lefatše le thehiloe.
