Moeletsi oa Basotho Beke ea 16 har’a selemo
Laboraro
Ho baloa Bukeng ea Moprofeta Jeremia. (1, 1.4-10)
“Ka u beha moprofeta oa lichaba.”
Tsena ke lipolelo tsa Jeremia, mor’a Hilkia, e mong oa baprista ba neng ba lula Anathothe, Naheng ea Benjamine. Lentsoe la Morena la mphihlela, la re: Ke u tsebile u e-s’o hlahe, ka u beha moprofeta oa lichaba. ‘Na ka re: “Oee, Morena Molimo! Ha ke e-s’o tsebe ho bua, ke sa le ngoana.”
Empa Morena a fetola, a re: U se ke ua re: “Ke sa le ngoana.” Hobane u tla ea ho bohle bao ke tla u roma ho bona, ‘me tsohle tseo ke tla u laela tsona, u li bolele. U se ke ua b’a tšoha, hobane ke na le uena ho u sireletsa, ho rialo Morena. Joale Morena a otlolla letsoho la hae, a ama molomo oa ka, ‘me a re ho ‘na: Bona, ke behile lipolelo tsa ka molomong oa hao. Kajeno ke u file matla holim’a lichaba le mebuso, hore u tsebe ho fothola le ho heletsa, ho timetsa le ho ripitla, ho aha le ho hloma.
PESALEMA 70 (1-6.15 le 17 .R. 15)
MOLOMO OA KA O TLA BOLELA PHOLOHO EA HAO.
Ke tšabela ho uena, Morena,
ke se ke mpe ka tlontlolleha le ka mohla.
Ka ho ea ka toka ea hao,
u ‘namolele ‘me u ntokolle,
ntšekehele tsebe ‘me u mpholose.
U be lefika leo ke itšireletsang ka lona,
qhobosheane eo ke tla pholoha ho eona;
efela ke uena lefika la ka le qhobosheane ea ka;
Molimo oa ka, ak’u ‘ntše liatleng tsa ea khopo.
Morena, ke uena tšepo ea ka,
Molimo, u bile setšehetso sa ka
ho tloha bocheng ba ka.
Ke itšetlehile ka uena ho tloha tlhahong ea ka,
u bile mosireletsi oa ka ho tloha popelong ea ‘mè.
Molomo oa ka o tla bolela ho loka ha hau,
le pholoho ea hau letsatsi lohle.
Molimo oa ka, u nthutile ho tloha bocheng ba ka,
ke phatlalalitse mesebetsi e tsotehang ea hao
ho fihlela kajeno.
Ho baloa Evangeling e halalelang e ngotsoeng ke Matheus. (13, 1-9)
“Peo e ‘ngoe ea beha tse lekholo.”
Ka nako eo, Jesu a tsoa ka tlung, a ea lula lebopong la leoatle. Eaba matšoele a mangata a mo khobokanela, hoo a bileng a kena sekepaneng, a lula, le letšoele lohle le le lebopong. A bolella batho tse ngata ka lipapiso, a re: Mojali o ne a tsoile ho ea jala. Ha a ntse a jala, peo e ‘ngoe ea oela tseleng, ‘me ha tla linonyana, tsa ja kaofela. E ‘ngoe ea oela mokurutlaneng, moo ho se nang mobu o mongata; ea phakisa ea mela, hobane mobu o ne o sa teba. Eare hoba letsatsi le chabe, ea e-cha, ea omella ke ho hloka metso. E ‘ngoe ea oela meutloeng eaba meutloa ea hola, ea e bipetsa. Tse ling tsa oela mobung o motle, ‘me tsa beha. E ‘ngoe ea beha tse lekholo, e ‘ngoe tse mashome a tšeletseng, e ‘ngoe eona tse mashome a mararo. Ea nang le litseba a ke a utloe!
