Moeletsi oa Basotho Beke ea 15 har’a selemo
Labohlano
Ho baloa Bukeng ea Moprofeta Isaia. (38, 1-6.21-22.7-9)
“Ke utloile thapelo ea hao, ke bone le meokho ea hao.”
Matsatsing ao, Hezekia a kulela lefu. Moprofeta Isaia mor’a Amose, a tla ho eena, a re: Ke sena seo Morena a se bolelang: Hlophisa ntlo ea hao, hobane o tla shoa u ke ke ua phela.” Hezekia a retelehela leboteng a rapela Morena, a re: “Oho Morena, hopola hle kamoo ke entseng ho lokileng mahlong a hao.” Hezekia a nt’o lla habohloko.
Eaba lentsoe la Morena le fihlela Isaia le re: Tsam’o re ho Hezekia: Ke sena seo Morena, Molimo oa Davida ntat’ao, a se bolelang: Ke utloile thapelo ea hao, ke bone le meokho ea hao. Joale ke tla eketsa litšiu tsa hao ka lilemo tse leshome le metso e mehlano. Uena ‘moho le motse ona, ke tla u namolela liatleng tsa khosi ea Assiria. Ke tla sireletsa motse ona.”
Isaia a laela, a re: “Tlisang hlama ea feiga, le thobe seso ka eona, a tle a fole”. Hezekia a botsa, a re: pontšo ke efe ea hore ke tla nyolohela Tempeleng ea Morena?”
Isaia a araba, a re: “Pontšo e tsoang ho Morena e pakang hore Morena o tla phethahatsa seo a se boletseng, ke ena: U bona moriti o entsoeng ke letsatsi lihatelong tse ahiloeng ke Akhaze: ke tla o khutlisetsa morao ka lihatelo tse leshome tseo o seng o li theohile.” Eaba letsatsi le khutlela morao ka lihatelo tse leshome tseo le neng le se le li theohile.
PESALEMA (Is 38, 10.11.12.16. R. 17)
MORENA, U PHOLOSITSE BOPHELO BA KA TIMELONG.
Ke ne ke itse: Ke tla falla ke sa le mocha.
ke behoe khorong ea Qalo-ea-bafu,
ke qetelle teng lilemo tsa ka.
Ka re: Ha ke sa tla bona Morena
lefatšeng la ba phelang ;
ha ke sa tla bona motho
har’a baahi ba lefatše.
Lehae la ka lea qhaqholloa, le tlosoa ho ‘na,
joaloka motlotloane oa molisana;
u phuthile bophelo ba ka joaloka selohi.
ua ba ua bo poma joaloka tšoele.
Morena, seo pelo ea ka e sebeletseng ho uena,
ke bophelo ba moea oa ka.
U tla mpholisa,
u boele u mphelise.
Ho baloa Evangeling e halalelang e ngotsoeng ke Matheus. (12, 1-8)
“Mor’a motho ke morena oa sabbatha.”
Ka nako eo Jesu a tsamaea har’a masimo a koro ka sabbatha. Kaha barutuoa ba hae ba ne ba lapile, ba qala ho kha liqoapi ba ja. Eare ha Bafarisi ba ba bona, ba re ho eena: Bona, barutuoa ba hao ba etsa se sa lumelloang ka sabbatha!
Empa eena a re ho bona: Na ha le e-s’o bale seo Davida a neng a se etse h’a lapile ‘moho le bao a neng a e-na le bona? Kamoo a neng a kene ka tlung ea Molimo kateng, ba ba ba ja mahobe a nyehelo, e leng seo eena, leha e le balekane ba hae, ba neng ba se na tokelo ea ho se ja, se lokela ho jeoa ke baprista feela?
Kapa na ha le e-s’o bale Molaong hore baprista ba roba molao oa sabbatha, tempeleng, ka letsatsi la sabbatha, empa ba hloke molato? Joale kea le bolella ke re: ho teng mona ho fetang tempele ka boholo. Hoja le ne le tsebile hore na ke ho re’ng ha ho thoe: Hoo ke ho batlang ke mohau e seng sehlabelo, le ka be le sa ka la tsoa ba hlokang molato; hobane Mor’a motho ke morena oa sabbatha.
