Moeletsi oa Basotho Beke ea 15 har’a selemo
Labone
Ho baloa Bukeng ea Moprofeta Isaia. (26, 7-9.12.16-19)
“Lona ba robetseng leroleng, tsohang le hooe ka thabo.”
Tsela ea ea lokileng e otlolohile, ke uena ea batalatsang tselana tsa ea lokileng. Morena, likahlolo tsa hao li supa tsela; ka hona re u lebeletse, lipelo tsa rona li laba-labela ho hopola lebitso la hao. Bosiu pelo ea ka ea u hloloheloa, ke u batla ka pelo ea ka eohle. Likahlolo tsa hao li ka leseli le khantšetsang lefatše, ka tsona baahi bohle ba lona ba ithuta ho loka.
Morena, u re sitsa ka khotso, ke uena ea phethahatsang tsohle tseo re li etsang. Morena, ha re le matšoenyehong re ile ra u batla, ra hoeletsa re le matsoalong, re pitliloe ka kotlo ea hao.
Pel’a hao, Morena, re ne re ka mosali ea kenang tIung, ea menekang, a bokolla ke bohloko ba pelehi. Re ne re emotse, re meneka joaloka ea pelehing; empa moea oa pholoho ha oa tla lefatšeng ka rona, ba neng ba ka ba aha lefatšeng ha b’a hlaha.
Bafu ba hao ba tla boela ba phela, litopo tsa bona li tla tsoha. Lona ba robetseng leroleng, tsohang le hooe ka thabo; hobane phoka ea hao, Morena, ke phoka e khanyang ‘me lefatše le tla khutlisa bafu.
PESALEMA 101 (13-14 le 15.16-18.19-21. F. 20)
MORENA O TALIMILE LEFATšE A LE MAHOLIMONG.
Uena Morena, u tla rena kamehla,
botumo ba hạo ke ba meloko le meloko.
U tla ema, u utloele Sione bohloko,
ke nako ea ho e hauhela, motsotso o fihlile.
Bahlanka ba hao ba rata majoe a eona,
ba qenehela esita le lerole la eona.
Le tsona lichaba li tla hlompha lebitso la Morena,
likhosi tsohle tsa lefatše letlotlo la hao;
hobane Morena o tla aha Sione bocha,
a iponahatse teng ka letlotlo la hae.
O tla retelehela ho ba se nang letho ha ba mo rapela,
a ke ke a khesa thapelo ea bona.
Tsena li ke li ngolloe moloko o tlang,
e le hore sechaba se tla tsoaloa se rorise Morena.
Morena o sheba a le qalong e phahameng ea hae,
o talimile lefatše a le maholimong,
hore a tle a utloe poboli ea motlamuoa,
a lokolle ba ahloletsoeng lefu.
Ho baloa Evangeling e halalelang e ngotsoeng ke Matheus. (11, 28-30)
“Ke bonolo, ebile ke pelo e boikokobetso.”
Ka nako eo, Jesu a re: Tloong ho ‘na, lona bohle ba sebetsang thata, ba imetsoeng, ‘me ke tla le khatholla. Itjariseng joko ea ka, le ithute ka ‘na, hobane ke bonolo ebile ke pelo e boikokobetso, ‘me le tla fumanela meea ea lona khatholoho. Ruri joko ea ka e monate, ‘me thoto ea ka e bobebe.
