Moeletsi oa Basotho Beke ea 15 har’a selemo
Laboraro
Ho baloa Bukeng ea Moprofeta Isaia. (10, 5-7.13-16)
“Na selepe se ka ikhantšetsa ea remang ka sona?”
Ke sena seo Morena a se bolelang: Ho malimabe Assiria, e leng thupa eo ke e tšoarang ha ke halefile, molamu oo ke o tsokang bohaleng ba ka. Ke mo rometse ho loantša morabe o khopo, ka mo laela ho loantša sechaba se nkhalefisitseng, hore a tle a hape, a be a ithuele tsohle tsa sona, a se hatakela joaloka seretse se tseleng.
Empa eena h’a nahane joalo, pelong ea hae h’a hopole joalo; empa se ka pelong ea hae ke ho timetsa le ho ripitla lichaba tse ngata-ngata. O itse: Tsena ke li entse ka matla a ka feela, le ka bohlale ba ka, kaha ke hlalefile. Ke felisitse meeli ea lichaba, ka ikhapela matlotlo a tsona, joaloka seqhobane ka theola ba literoneng.
Letsoho la ka le nkile matlotlo a lichaba joaloka ha eka ke sehlaha sa nonyana. Ke inketse lefatše kaofela joaloka ha motho a ntšetsa mahe ho se nonyana e phuphuselang, leha e le ho ahlamisa molomo e lla.
Na selepe se ka ithorisetsa ea remang ka sona, le sakha ea ikhantšetsa ea pomang ka eona? Ho ka ba joaloka hoja ke thupa e tsamaisang letsoho le e tšoereng kapa molamu ke oona o tsokang ea fetang patsi.
Ka baka leo Morena Molimo oa makhotla o tla otisa batho ba nonneng ba Assiria, letlotlo la bona le fetohe malakabe a mollo o tukang.
PESALEMA 93 (5-6.7-8,9-10.14-15. R. 14)
MORENA A KE KE A LAHLA SECHABA SA HAE.
Morena, ba khopo ba hatakela sechaba sa hao,
ba hatella ba lefa la hao.
Ba bolaea mohlolohali le mojaki,
ba timetsa le likhutsana.
Ba ntse ba re: “Morena h’a bone,
Molimo oa Jakobo h’a hlokomele letho.
Hlokomelang, lona litlaopa tse fetang tsohle!
Lithoto ting, le tla ba le kutloisiso neng?
Ea melisitseng tsebe a ka sitoa ke’ng ho utloa?
Ea bopileng leihlo a ka sitoa ke’ng ho bona?
Ea rupelang lichaba a ka sitoa ke’ng ho li khalemela,
eena ea rutang batho bohlale?
Ho baloa Evangeling e halalelang e ngotsoeng ke Matheus. (11, 25-27)
“U li patetse ba bohlale le ba seli ‘me u li senoletse bana.”
Ka nako eo Jesu a bua joana: Kea u leboha, Ntate. Morena oa leholimo le oa lefatše, hobane litaba tsena u li patetse ba bohlale le ba seli ‘me u li senoletse bana. E, Ntate, hobane hona e bile boithatelo ba hao.
Tsohle ke li nehiloe ke Ntate. Ha ho ea tsebang Mora, ha e se Ntate; ‘me ha ho ea tsebang Ntate, ha e se Mora le eo Mora a ratang ho mo senolela eena.
