Moeletsi oa Basotho Beke ea 13 har’a selemo
Labotšelela
Sehopotso sa Maria Goretti, movirigo le moshoela-tumelo
Ho baloa Bukeng ea Moprofeta Amose. (9, 11-15)
“Ke tla khutlisa ba kholehong ba sechaba sa ka, ‘me ke tla ba hloma lefatšeng la habo bona.”
Ke sena seo Morena a se bolelang: Mohlang oo, ke tla tsosa motlotloane oa Davida o oeleng, ke thibe likheo tsa lerako la oona, ke tsose lithako tsa oona, ke o ahe bocha, o be joaloka mehleng e fetileng, ba ntlo ea Israele ba tle ba ikhapele ho setseng hoa Edomo, le lichaba tsohle tse tla bitsoa ka lebitso la ka, ho rialo ‘na Morena, ea tla phethahatsa tsena tsohle. Matsatsi aa tla, ho rialo Morena, ao ka ‘ona ea lemang le ea kotulang, ea tlhotlang morara le ea jalang peo, ba sa tlo sieana. Lithaba li tla rotha veine e ncha, e kolle maralleng ohle. Ke tla khutlisa ba kholehong ba sechaba sa ka sa Israele: ba tla tsosa metse e senyehileng, ba ahe ho eona, ba tla lema morara, ba noe veine ea oona, ba tla etsa lirapa, ba je litholoana tsa teng. Ke tla ba hloma lefatšeng la habo bona, ‘me ha ba sa tla hlola ba fotholoa lefatšeng leo ke ba nehileng lona, ho rialo Morena Molimo oa hao.
PESALEMA 84 (9.11-12.13-14. R. 9)
MORENA O BUA KA TSA KHOTSO LE SECHABA SA HAE.
Ke rata ho utloa se boleloang ke Morena Molimo,
hobane o bua ka tsa khotso
le sechaba le metsoalle ea hae,
hore ba se ke ba khutlela bothotong ba bona.
Mohau le ‘nete li tla khahlametsana,
toka le khotso li akane.
‘Nete e tla runya lefatšeng,
toka e lepelle le maholimong.
Morena ka sebele o tla fana ka tse molemo,
lefatše la rona le behe litholoana.
Toka e tla mo etella pele,
khotso eona e mo felehetse.
Ho baloa Evangeling e halalelang e ngotsoeng ke Matheus. (9, 14-17)
“Na ba ka hlomoha nakong eo monyali a ntseng a e-na le bona?”
Ka nako eo, barutuoa ba Joannes ba tla ho Jesu, ba re: Ke ka baka la’ng ha rona le Bafarisi re itima lijo hangata, empa barutuoa ba hao bona ba sa itime? Jesu a ba araba a re: Ana baetsana ba ka hlomoha nakong eo monyali a ntseng a e-na le bona na? Ho tla tla matsatsi ao ka ‘ona monyali a tla tlosoa ho bona, e be hona ba ka itimang.
Joale motho h’a ke a rokelle setsiba sa lesela le lecha seaparong sa khale, hobane setsiba se ka hlephola seaparo, ‘me sa eketsa ho taboha. Le teng motho h’a ke a tšela veine e ncha makukeng a khale, esere mohlomong makuka a phatloha, veine ea tšoloha, le ‘ona makuka a senyeha; motho o ee a mpe a tšele veine e ncha makukeng a macha, ‘me li bolokeha bobeli ba tsona.
