Moeletsi oa Basotho Beke ea 13 har’a selemo
Labohlano
Ho baloa Bukeng ea Moprofeta Amose. (8, 4-6.9-12)
“Ke tla lihela naha ena tlaleng, ha e na ho lapela bohobe empa e tla lapela lipolelo tsa Morena.”
Utloang hona, lona ba hatakelang mohloki ka maoto, ba ratang ho timetsa ba eisehang ba naha ena, le re: “Tsatsi la ho thoasa ha khoeli le tla feta neng, re tsoe re rekisa koro? Sabbatha le sona se tla feta neng re tsoe re bula meliko, re tle re fokotse tekanyo, empa re eketse theko, re sebelise likala ka ho qhekella, re tle re reke mofutsana ka chelete le mohloki ka meqathatso, re rekise esita le litlhoka tsa koro?” Morena o hlapantse ka letlotlo la Jakobo, o itse: Le ka mohla nke ke ka lebala leha e le ‘ngoe ea liketso tsa bona.
Mohlang oo, ho rialo Morena Molimo, ke tla liketsa letsatsi motšeare o moholo, ke fifatse lefatše har’a mpa ea motšeare. Ke tla fetola mekete ea lona bofifi, le lipina tsohle tsa lona koli-ea-malla; bohle ke tla ba tentša masela a mahoashe thekeng, bohle ke ba kute lekoroana, ke tla etsa hore le lle, joaloka ha ho lleloa mora a įnotši oa motho; e tla ba letsatsi le babang ho isa qetellong.
Matsatsi aa tla, ho rialo Morena Molimo, ao ka ‘ona ke tla lihela naha ena tlaleng: ha e na ho lapela bohobe, leha e le ho nyoreloa netsi, empa e tla lapela lipolelo tsa Morena. Batho ba tla lelera ho tloha leoatleng le leng ho ea ho le leng, ba phaile ho tloha Leboea ho isa Bochabela, ba ntse ba batla Lentsoe la Morena, empa ba ke ke ba le fumana.
PESALEMA 118 (2.10.20.30.40.131, R. Mt 4, 4)
MOTHO HA A PHELE KA BOHOBE FEELA EMPA LE KA POLELO EOHLE E TSOANG MOLOMONG OA MOLIMO.
Ho lehlohonolo ba utloang litemoso tsa hae,
ba ‘matlang ka pelo tsohle tsa bona.
Ke u batla ka pelo eohle ea ka,
se ntumelle ho kheloha melao ea hao.
Bophelo ba ka boa ngongoreha
ke ho hloloheloa likahlolo tsa hao ka nako tsohle.
Ke ikhethetse tsela ea botšepehi,
ke ipapisitse le likahlolo tsa hao,
Ke hlolohetsoe litaelo tsa hao hampe,
u mphelise ka toka ea hao.
Ke ahlamisa molomo, kea feheloa,
hobane ke lapetse melao ea hao.
Ho baloa Evangeling e halalelang e ngotsoeng ke Matheus. (9, 9-13)
“Ba hlokang ngaka ha se ba phelang hantle. Hoo ke ho batlang ke mohau, e seng sehlabelo.”
Ka nako eo, ha Jesu a tloha moo, a bona monna ea bitsoang Matheus a lutse tlung ea khafa, ‘me a re ho eena: Ntatele! Eaba Matheus oa ema, oa mo latela.
Eitse ha Jesu a ntse a le lijong ka tlung, bakhafisi le baetsalibe ba bangata bạ tla lula le eena le barutuoa ba hae. Ha Bafarisi ba bona hoo, ba re ho barutuoa ba hae: Ke ka baka la’ng ha moruti oa lona a e-ja le bakhafisi le baetsalibe?
Jesu a ba utloa, ‘me a re ho bona: Ba hlokang ngaka ha se ba phelang hantle, empa ke ba kulang. Tsamaeang le e’o ithuta hore na ke ho re’ng ha ho thoe: Hoo ke ho batlang ke mohau, e seng sehlabelo. Hobane ha kea tla ho bitsa ba lokileng, empa baetsalibe.
