Moeletsi oa Basotho Beke ea 13 har’a selemo
Mokete oa Thomas ea Halalelang
Ho baloa Lengolong la Moapostola Paulosi ho Ba-Efese. (2, 19-22)
“Moaho o tiileng o nts’o hola ho ba tempele e halalelang ea Morena.”
Bana beso! Ha le sa le baeti kapa balichaba, empa le ba sechaba se le seng le bahalaleli, ‘me le ba ntlo ea Molimo. Le moaho o thehiloeng holim’a baapostola le baprofeta, oo Kriste Jesu ka sebele sa hae e leng lejoe la oona la ntlha. Holim’a hae moaho o tiileng o nts’o hola ho ba tempele e halalelang ea Molimo. Le lona le etsoa moaho o le mong ho eena, le tle le be ntlo ea Molimo ka tšebetso ea Moea o halalelang.
E-EANG KA LEFATšE LOHLE, LE PHATLALLETSE LIBOPUOA TSOHLE MOLAETSA OA TABA TSE MONATE.
Rorisang Morena, lona lichaba tsohle,
mo tlotliseng lona merabe eohle.
Hobane mohau oa hae ho rona o matla,
le ‘nete ea Morena ke e sa feleng.
Ho baloa Evangeling e halalelang e ngotsoeng ke Joannes. (20, 24-29)
“Morena oa ka le Molimo oa ka!”
Thomas, e mong oa ba leshome le metso e ‘meli, ea bitsoang lefahla, o n’a le sieo ho bona ha Jesu a n’a tlile. Barutuoa ba bang ba re ho eena: Re bone Morena! Empa eena a re ho bona: Ha e se ha nka bona maqeba a lithakhisa matsohong a hae, ka kenya monoana oa ka masobeng a lithakhisa, ‘me ka beha letsoho la ka lehlakoreng la hae, nke ke ka lumela.
Ka morao ho matsatsi a robileng meno e ‘meli, barutuoa ba hae ba ne ba ntse ba le ka tlung hape, le Thomas a e-na le bona. Jesu a tla, mamati a nts’a koetsoe, a ema ka har’a bona, ‘me a re: Khotso e be le lona!
A nt’o re ho Thomas: Kenya monoana oa hao mona, ke ana matsoho a ka! Tlisa le letsoho la hao, ‘me u le kenye lehlakoreng la ka, ‘me u se be ea sa lumeleng, u mpe u be ea lumelang. Thomas a araba, a re ho eena: Morena oa ka le Molimo oa ka! Jesu a re ho eena: Thomas, kahobane u mpone, u Iumetse. Ho lehlohonolo ba lumelang, leha ba sa ka ba bona.
