Moeletsi oa Basotho Beke ea 7 ea Paseka
Labotšelela hoseng
Ho baloa Bukeng ea Liketso tsa Baapostola. (28,16-20.30-31)
“Paulosi a lula Roma, a phatlalatsa ‘Muso oa Molimo.”
Ha re fihlile Roma, Paulosi a lumelloa ho lula tlung ea hae, a e-na le lesole le mo lebelang. Kamorao ho matsatsi a mararo, a mema baholo ba Bajodi, ‘me ha ba phuthehile, a re ho bona:
Banna ba heso, leha ke sa ka ka etsa letho le loatšanang le sechaba kapa meetlo ea bo-ntat’a rona, ke ile ka kenngoa chankaneng Jerusalema ‘me ka neheloa liatleng tsa Ba-Roma.
Bona, ha ba se ba mpotsitse, ba ne ba rata ho ntokolla, hobane ho no ho se molato o lokelang lefu ho ‘na. Eare ha Bajodi ba hana, ka tlameha ho ipiletsa ho Cesare, empa ke se na morero oa ho qosa sechaba sa heso ka ho hong. Ke ka baka lena ke kopileng ho le bona le ho bua le lona, hobane ke tlamiloe ka liketane tsena ka baka la tšepo ea Israele.
Paulosi a lula lilemo tse peli tlung eo a neng a e lefeletse. O ne a amohela bohle ba tlang ho eena, a phatlalatsa ‘Muso oa Molimo, a ruta litaba tsa Morena Jesu Kriste ka sebete, a sa khinoe ke letho.
PESALEMA 10 (4-5.7: R. 7)
BA SE NANG MANO BA TLA BOHA SEFAHLEHO SA HAO, MORENA.
Morena o tempeleng e halalelang ea hae,
Terone ea Morena e maholimong.
Mahlo a hae a nts’a alositse tsohle,
ka ho panya ha ntši
o s’a hlahlobile bana ba batho,
Morena o lokile, o rata tse lokileng,
ba pelo Ii ntle ba tla boha sefahleho sa hae.
Ho baloa Evangeling e halalelang e ngotsoeng ke Joannes. (21,20-25)
“Enoa, ke eena morutuoa ea ngotseng tsena, ‘me bopaki ba hae ke ba ‘nete.”
Ka nako eo, ha Peterosi a reteleha, a bona morutuoa ea neng a ratoa ke Jesu a ba setse morao, ea neng a sekame sefubeng sa hae mohla selallo, a re: Morena, ke mang ea tla u eka na? Eitse ha Peterosi a ‘mona, a re ho Jesu: Morena, eo eena, u re’ng ka eena na? Jesu a re ho eena: Ha nka rata hore a sale joalo ho fihlela ke e-tla, na hoo ke taba ea hao? Uena, ntatele.
Ha tuma har’a baena polelo e reng morutuoa eo a ke ke a shoa, empa o n’a itse: Ha nka rata hore a sale joalo ho fihlela ke e-tla, na hoo ke taba ea hao? Enoa, ke eena morutuoa eo ea pakang tsena, ea bileng a li ngola; ‘me re tseba hore bopaki ba hae ke ba ‘nete.
Joale ho sa le teng ntho tse ngata tseo Jesu a li entseng, tseo ke kholoang hore, hoja li ka ngoloa ka bonngoe, esita le lefatše kaofela le ke ke la kopa libuka tse neng li ka ngoloa.
