Moeletsi oa Basotho LABOTšELELA LE HALALELANG
Ho baloa Bukeng ea Genese. (1,1-2,2)
“Molimo a bona tsohle tseo a li entseng, ‘me ho ne ho lokile haholo.”
Qalehong Molimo o ile a bopa leholimo le lefatše. [Lefatše le ne le le feela, le se na letho, lefifi le aparetse boliba, ‘me Moea oa Molimo o n’o foka holim’a metsi. Molimo a re: Leseli a le be teng. ‘Me leseli la e-ba teng. Molimo a bona hore leseli le lokile, ‘me Molimo a arola leseli ho lefifi. Molimo a bitsa leseli nyene, le lefifi bosiu. Ea e-ba mantsiboea, ea e-ba hosasa: ke lona letsatsi la pele.
Molimo a re: ho be le sebaka se tiileng pakeng tsa metsi, ‘me se arole metsi ho metsi. ‘Me ha e-ba joalo. Molimo a etsa sebaka se tiileng, se arolang metsi a ka tlase ho sebaka seo, ho metsi a ka holimo ho sona, ‘me Molimo a reha sebaka seo leholimo. Ea e-ba mantsiboea, ea e-ba hosasa: ke lona letsatsi la bobeli.
Molimo a re: Metsi a ka tlase ho leholimo a bokane nqa e le ‘ngoe, ‘me ho hlahe ho ommeng. ‘Me ha e-ba joalo. Molimo a bitsa ho ommeng lefatše, le pokello ea metsi a e bitsa maoatle. Molimo a bona hore ho lokile. Molimo a re: Lefatše a le hlahise botalana, majoang a behang lipeo, le lifate tsa litholoana tse nang le peo.
Lefatše la melisa botalana, majoang a behang lipeo ka mefuta ea ‘ona le lifate tsa litholoana tse nang le peo. Molimo a bona hore ho lokile. Ea e-ba mantsiboea, ea e-ba hosasa: ke lona letsatsi la boraro.
Molimo a re ho be teng maseli holimo sebakeng, ho arola nyene le bosiu, ho bontša linako, matsatsi le lilemo. E be maseli a holimo sebakeng, a khantšetsang lefatše. ‘Me ha e-ba joalo. Molimo a etsa maseli a mabeli a maholo: leseli le leholo le tla laola nyene le leseli le lenyenyane le tla laola bosiu; a etsa le linaleli. Molimo a li beha holimo sebakeng, ho khantšetsa lefatše, ho laola nyene le bosiu, ho arola leseli ho lefifi. Molimo a bona hore ho lokile. Ea e-ba mantsiboea, ea e-ba hosasa: ke lona letsatsi la bone.
Molimo a re: Metsing ho nyeunye boieane ba lintho tse phelang, ‘me linonyana li fofe holim’a lefatše, sebakeng. ‘Me ha e-ba joalo. Molimo a bopa likhanyapa tse kholo tsa maoatle le lintho tsohle tse phelang, tse sesang, tse nyeunyang ka metsing, ka mefuta ea tsona, le linonyana tsohle, ka mefuta ea tsona. Molimo a bona hore ho lokile. Molimo a li hlohonolofatsa, a re: Atang, le ngatafale, le tlale metsing a leoatle, ‘me le linonyana li ngatafale lefats’eng. Ea e-ba mantsiboea, ea e-ba hosasa: ke lona letsatsi la bohlano.
Molimo a re: Lefatše le hlahise lintho tse phelang, ka mefuta ea tsona: liphoofolo tse ruiloeng, lihahabi le liphoofolo tse hlaha, ka mefuta ea tsona. ‘Me ha e-ba joalo. Molimo a etsa liphoofolo tse hlaha ka mefuta ea tsona, liphoofolo tse ruiloeng, ka mefuta ea tsona, le tsohle tse hahabang fatše, ka mefuta ea tsona. Molimo a bona hore ho lokile.
Molimo a re: A re etseng motho ka setšoantšo sa rona le ka tšoano le rona, a rene holim’a lihlapi tsa leoatle, linonyana tsa leholimo, liphoofolo tse ruiloeng, liphoofolo tse hlaha le lihahabi tsohle tse hahabang fatše. Molimo a bopa motho ka setšoantšo sa hae, a mo bopa ka setšoantšo sa Molimo, a ba bopa e le e motona le e motsehali. Molimo a ba hlohonolofatsa, a re ho bona: Atang le ngatafale, le tlale lefatše, le le buse, le rene holim’a lihlapi tsa leoatle, linonyana tsa leholimo le tsohle tse phelang tse hahabang fatše.
Molimo a re: Ke le file majoang ohle a beang lipeo a ka bophara ba lefatše lohle, le lifate tsohle tse behang litholoana tse nang le peo, hore e be lijo tsa lona. Ha e le liphoofolo tsohle tse hlaha, linonyana tsohle tsa leholimo, tsohle tse hahabang fatše, tse nang le phefumoloho ea bophelo, ke li file litlama-tlama tsohle tse tala hore e be lijo tsa tsona. ‘Me ha e-ba joalo.
Molimo a bona tsohle tseo a li entseng, ‘me ho ne ho lokile haholo. [Ea e-ba mantsiboea, ea e-ba hosasa: ke lona letsatsi la botšelela.
Leholimo le lefatšše tsa phethahala joalo, hammoho le makhotla ohle a tsona. Ka letsatsi la bosupa, Molimo a phethahatsa mosebetsi oo a o entseng, ‘me ka letsatsi lena la bosupa a phomola mosebetsing ohle oo a o entseng.]
PESALEMA 103 (1-2.5-6.10.12-14.24.35. R7. 30)
ROMELA MOEA OA HAO, MORENA, ‘ME U NCHAFATSE SEBOPEHO SA LEFATšE.
Boka Morena, moea oa ka!
U moholo hakakang, Morena, Molimo oa ka,
u apere botlotlehi le khanya.
U ipopa ka leseli se ka kobo,
u phutholla maholimo joaloka tente.
U tsitsisitse lefatše holim’a motheo oa lona,
hore le se sisinyehe ka mengoaha le mengoaha.
U le koahetse ka maliba se ka seaparo,
metsi a n’a phahametse esita le lithaba.
U laela liliba ho phallela likhohlong,
li mathe pakeng tsa lithaba.
Linonyana tsa leholimo li hahela pel’a tsona,
li letsa meloli makaleng a lifate.
U noesetsa lithaba, u le qalong e phahameng ea hao,
lefatše u le fepa litholoana tsa e mesebetsi hao.
U melisetsa liphoofolo joang,
Le motho lijalo tseo a li lemang.
E mengata hakakang mesebetsi ea hau, Morena,
tsohle o li entse ka bohlale.
Lefatše le tletse libopuoa tsa hau.
Boka Morena moea oa ka!
Ho baloa Evangeling e halalelang e ngotsoeng ke Mareka. (16,1-8)
“Jesu oa Nazaretha ea neng a thakhisitsoe o tsohile.”
Ha Sabbatha se se se fetile, Maria Magdalena, Maria ‘m’a Jakobo, le Salome ba reka linoko, ho ea tlotsa setopo sa Jesu. E sa le hoseng, tsatsing la pele la beke, ba ea lebitleng ha le chaba. Ba ne ba buisana, ba re: Ke mang ea tla re ribollela lejoe le monyakong oa lebitla na?
Eare ha ba talima, ba bona lejoe le se le ribolotsoe; le ne le le leholo haholo. Ha ba kena lebitleng, ba bona mohlankana ea lutseng ka ho le letona, a apere seaparo se sesoeu, ‘me ba tšoha haholo.
Empa eena a re ho bona: Se tšoheng! Le batla Jesu oa Nazaretha, ea neng a thakhisitsoe: O tsohile, ha a eo mona. Bonang qalo eo ba neng ba ‘mehile ho eona. Ha e le lona e-eang, le bolelle barutuoa ba hae le Peterosi hore o le etella pele ho ea Galilea; ke moo le tla ‘mona teng, joaloka ha a le boleletse.
Ba tsoa lebitleng, ba baleha, ka ha ba ne ba thothomela ke tšabo, ‘me ha ba ka ba bolella motho letho, ka baka la ho tš4oha.
