Moeletsi oa Basotho Beke ea 3 ea Karisima
Labohlano
Ho baloa Bukeng ca Moprofeta Hosea. (14,2-10)
“Ha re sa tla re “Molimo oa rona” ho seo e leng mosebetsi oa matsoho a rona.”
Ke sena seo Morena a se bolelang: Israele, khutlela ho Morena, Molimo oa hao, hobane u oele ka baka la molato oa hao. Itokisetseng ho hlahisa sello sa lona, le khutlele ho Morena, le re ho eena: Ak’u ts’oarele molato oohle oa rona, u re tsoele molemo; bakeng sa ho nyehela mahlabelo a lipohoana, re tla u leboha ka melomo ea rona. Ba-Assiria ba ke ke ba re pholosa, ha re sa tla palama lipere tsa ntoa. Ha re sa tla re: Molimo oa rona! Ho seo e leng mosebetsi oa matsoho a rona. Hobane ke uena ea utloelang khutsana bohloko.
Joale ke tla ba folisa bokoenehi ba bona, ke ba rate ka pelo eohle ea ka; hobane khalefo ea ka e ba hatohile. Ke tla ba joaloka phoka ho Israele; o tla thunya joaloka mohalalitoe, a kenye metso mobung joaloka kedare ea Lebanone. O tla hlahisa mahlomela, o tla ba le botle bo kang ba mohloare, a be monko o monate joaloka Lebanone.
Ba-Israele ba tla boela ba lula moriting oa ka, ba tla lema koro haholo; ba tla thunya joaloka morara, ba tume joaloka veine ea Lebanone. Efraime o na le taba efe le melimo ea bohata? ‘Na kea mo mamela, ‘me kea mo hlokomela. ‘Na ke joaloka sefate sa ciprese se setala ka mehla: ke ka thuso ea ka u behang litholoana. Ea bohlale a ke a utloisise taba tsena, ea nang le kelello a li tsebe. Litsela tsa Morena li otlolohile; ba lokileng ba tsamaea ka tsona, empa baetsalibe ba tla khoptjoa ho tsona.
PESALEMA 80 (6-11.14 le 17. 11 le 9)
KE ‘NA MORENA MOLIMO OA HAO, U MAMELE LENTSOE LA KA.
Ha utloahala puo e sa tsejoeng, e re:
Ke tlositse mojaro lehetleng la hae,
matsoho a hae a nyahlatsa seroto sa liahi.
Ha u le mats’oenyehong u ile ua hoeletsa,
ka u pholosa.
Ka u araba, ke siretse ka maru a lumang,
ka u nonya metsing a meriba.
Mamela, uena sechaba sa ka, ke u lemose;
Israele, hoja u ka nkutloa!
Ha hao ho se be Molimo osele,
u se ke ua khumamela molimo o sa tsebisahaleng.
Ke ‘na Morena Molimo oa hao,
ea u nts’itseng naheng ea Egepeta;
ahlama haholo, ke tle ke tlatse molomo oa hao.
Hoja sechaba sa ka se ne se ka ‘mamela,
hoja Israele a ne a ka tsamaea tseleng tsa ka!
Empa Israele ke ne ke tla mo fepa ka koro e ntlehali
ke mo khorise ka linotši tse tsoang lefikeng.
Ho baloa Evangeling e halalelang e ngotsoeng ke Mareka (12, 28-34)
“Morena Molimo oa hao ke eena Morena a inotši; u mo rate.”
Ka nako eo, e mong oa bangoli a fihla ho Jesu, a ‘motsa, a re: Melaong eohle ke ofe oa pele? Jesu a mo fetola, a re: Molao oa pele ke ona: Mamela, uena Israele, Morena Molimo oa rona ke eena Morena a inotsi: U tla rata Morena Molimo oa hao ka pelo ea hao eohle le ka moea oa hao oohle le ka kutloisiso ea hao eohle, le ka matla a hao ‘ohle. Oa bobeli ke ona: U tla rata oa heno joaloka ha u ithata. Ha ho molao o mong o fetang ena ka boholo.
Eaba mongoli o re ho eena: Ke hantle, moruti, u boletse ‘nete ha u re Molimo o mong feela, ‘me ha ho e mong ka ntle ho eena, le hore o ts’oanetse ho ratoa ka pelo eohle, le ka kutloisiso eohle, le ka moea oohle, le ka matla ‘ohle, le hore ho rata oa habo motho joaloka ha motho a ithata, ke taba e kholo ho feta licheso le mahlabelo ‘ohle.
