Moeletsi oa Basotho Beke ea 2 ea Karisima
Labotšelela
Ho baloa Bukeng ea Moprofeta Mikea. (7,14-15.18-20)
“U lahlele libe tsa rona bolibeng ba leoatle.”
Alosa sechaba sa hao ka lere la hao, mohlatsoana oa lefa la hao, o lulang o le mong morung o ka hare ho Karmele; o ke o alohele Bahane le Gileade, joaloka mehleng ea khale. Ak’u re bontše tse tsotehang, joaloka mohla u tsoang naheng ea Egepeta.
Molimo ke ofe o kang uena? U hlakola melato, u leballa masalla a lefa la hao litlolo tsa ‘ona, u ke ke ua tlokoma ke khalefo ho-ea-ho-ile, hobane u khahloa ke ho re hauhela. U tla boela u re rekolohela, u tla felisa melato ea rona, u lahlele libe tsa rona bolibeng ba leoatle. U tla bontša botšepehi ho Jakobo le mohau ho Abrahama, joaloka ha u hlapanyelitse bo-ntat’a rona mehleng ea khale.
PESALEMA 102 (1-4.9-12. R. 8)
MORENA O MOSA, O LEREKO.
Boka Morena, moea oa ka, ka matla ‘ohle a hao,
u boke lebitso le halalelang la hae.
Boka Morena, moea oa ka,
u se ke ua lebala melemo eohle ea hae.
Ke eena ea tšoarelang melato eohle ea hao,
ea folisang maloetse ‘ohle a hao;
o pholosa bophelo ba hao lebitleng,
o u roesa mohau le mosa se-ka-tlokola.
A ke ke a qosa ho ea-ho-ile,
le khalefo ea hae ha se ea ka mehla.
Ha a re tšoare kamoo libe tsa rona li lokelang kateng,
ha a re buseletse ho ea ka melato ea rona.
Joaloka ha maholimo a phahametse lefatše,
ka mokhoa o tšoanang mohau oa hae
o moholo ho ba mo tšabang.
Joaloka ha Bochabela bo arohane le Bophirima,
ka mokhoa o tšoanang
o qhelela liphoso tsa rona thoko le rona.
Ho baloa Evangeling e halalelang e ngotsoeng ke Luka (15,1-3.11-32)
“Ngoana enoa oeno o n’a shoele, ‘me o boetse oa phela.”
Ka nako eo, bakhafisi bohle le baetsalibe ba ne ba e-tla ho Jesu ho mo mamela. Bafarisi le bangoli ba ne ba luma-luma, ba re: Enoa o amohela baetsalibe, ‘me o ja le bona. Eaba o ba bolella papiso ena, a re: Motho e mong o n’a e-na le bara ba babeli. E monyenyane a re ho ntat’ae! Ntate, hl’u nkabele lefa leo e tlang ho ba la ka maruong a hao. Eaba o ba arolela maruo a hae. Ka morao ho matsatsi a seng makae, mora e monyenyane a bokella tsohle tsa hae, a ea jaka hole lichabeng, moo a ileng a senya lintho tsa hae ka ho phela bophelo bo bohlasoa.
Eare hoba a rume tsohle, ha oa tlala e kholo naheng eo, ‘me a qala ho sotleha. A ea kopa mosebetsi ho e mong oa baahi ba naha eo, ‘me eena a mo romela naheng ho ea alosa likolobe. O n’a khalla ho ja makhapetla ao ho fepjoang likolobe ka ‘ona, empa ho ne ho se ea mo fang ‘ona. Ha a tebisa maikutlo boinahanong ba hae a re: Batholuoa ba Ntate, leha ba le bangata hakana, ha ba ke be ba hloke bohobe, athe ‘na ke bolaoa ke tlala mona! Ke tla tsamaea, ke ee ho ntate ke fihle ke re: Ntate, ke sitetsoe Leholimo le uena ke u sitetsoe, hoo ke seng ke sa ts’oanele ho bitsoa mora oa hao, mpe u nkuke joaloka e mong oa batholuoa ba hao. Eaba oa tsamaea o ea ho ntat’ae.
Eare a sa le hole, ntat’ae a ‘mona, a hauha a mathela ho eena, a mo kopa ka molala a ba a mo aka. Eaba mora o re ho eena: Ntate, ke sitetsoe leholimo le uena ke u sitetsoe, ha ke sa lokela ho bitsoa mora oa hao. Empa ntat’ae a re ho bahlanka ba hae: Phakisang, le tlise seaparo se setle-setle le mo apese sona, le mo roese lesale monoaneng, le be le mo roese lieta. Latang namanenyana e nonneng, le e hlabe, re je, re keteke, hobane enoa mora oa ka o n’a shoele ‘me o boetse oa phela, o n’a lahlehile ‘me o fumanoe. Joale ba qalella ho keteka.
Mora oa hae e moholo eena o n’a le masimong, ‘me eitse haa e-tla, a atamela lapeng, a utloa lipina le mehobelo. Ke ha a bitsa e mong oa bahlanka, a ‘motsa na ho hlahile eng. Eo a re ho eena: Ngoan’eno o fihlile, ‘me ntat’ao o mo hlabetse namanenyana e nonneng, hobane o khutletse ho eena a ntse a iphelela hantle. Eaba oa halefa, o hana le ho kena, Ntat’ae a tsoa, a mo rapela. Eena a araba, a re ho ntat’ae: Ua bona, ke u sebelelitse ka lilemo tse ngata haholo, ke sa fose litaelo tsa hao le ka mohla, empa ha u e-s’o ‘nehe leha e le potsanyane feela, ke tle ke iketekele le metsoalle ea ka. Athe ha enoa mora oa hao, ea jeleng leruo la hae le linyatsi, a qala ho fihla u s’u mo hlabela namane e nonneng.
Eaba ntat’ae o re ho eena: Ngoan’a ka, uena, u na le ‘na ka mehla, ‘me tsohle tsa ka ke tsa hao. E ne e le ts’oanelo ho etsa mokete le ho thaba, hobane ngoana enoa oeno o n’a shoele ‘me o boetse oa phela, o n’a lahlehile ‘me o fumanoe.
