Nthabeleng Seitlheko UNFP e itlama ho ts’ehetsa paramente ho hlahloba melao e shebanang le liqholotso tsa tlhekefetso, lenyalo la bana ba tlase lilemong le ts’ireletso ea batho ba tlokotsing hore Naha ea Lesotho e be boemong ba ho ikemela le ho etsa liqeto tse matla sebakeng sa batho bohle. Tsena li hlaheletse ‘mokeng o neng o ts’oaretsoe maparamente le Mekhatlo e Ikemetseng, ke SADC- PF, ka la 15 Hlakola monongoaha.
Molula-Setulo oa Balula-Litulo ba Likomiti tsa Paramente Mokhothu Makhalanyane, o hlalositse hore e le maparamente ba tlameha ho sebetsa ka thata ho bona hore ho ba le melao e sireletsang bana, litokelo tsa bona ‘moho le tsa mafutsana. A re ba hloka hore makala a fane ka litlaleho tsa ts’ebeliso ea lichelete hore bafani ba bone maputulo a tsona.
A re botlalehi bo bohlasoa bo se nang ponaletso ba ts’ebeliso ea lichelete bo nyahamisa bafani, ‘me taba eo e beha ‘muso tsietsing ‘moho le Mekhatlo e Ikemetseng.
Motsamaisi oa Lipuisano Paramenteng, Mohlomphehi Tlohang Sekhamane o re bakhethoa ba lokela ho ikopanya le sechaba molemong oa ho aha likamano tse mofuthu.
O re nako e fihlile ea hore ba tsebise sechaba ‘nete, hobane ha se mosebetsi oa mokhethoa ho kenya metsi le motlakase. A re maparamente a leka sohle se matleng a bona ho bona hore ba fihlela litlhoko tsa sechaba, empa ha ba na bokhoni kaha seo e se karolo ea mesebetsi ea bona. A re a tlasa khatello ea ho etsa mosebetsi ea sechaba, ‘me taba ena e etsa ba tsoelepele ho bua mafosisa, ka hona ba khaotse, ‘me ba tsepamise maikutlo mosebetsing oo ba o khethetsoeng ke sechaba.
O re ba lokela ho bua ka litaba tsa bophelo bo botle khafetsa, ba li phele nako eohle hobane liqholotso tse tobaneng le bacha le sechaba li ngata.
