Moeletsi oa Basotho Beke ea bobeli ea Karisima
Labone
Ho baloa Bukeng ea Moprofeta Jeremia. (17,5-10)
“Ho malimabe ea behang tšepo ea hae bathong. Ho lehlohonolo ea itšetlehang ka Morena.”
Ke sena seo Morena a se bolelang: Ho malimabe motho ea behang tšepo ea hae bathong, ea batlang matla a hae ho bona, empa pelo ea hae e furaletse Morena. O ka hlaba-hlabane e lehoatateng, e ke keng ea tleloa ke letho le molemo, e melang libakeng tse chesoang ke letsatsi, feelleng, lefatšeng la lenyekethe, nahathothe.
Ho lehlohonolo motho ea itšetlehang ka Morena, eo Morena e leng tšepo ea hae. O ka sefate se lenngoeng pel’a metsi, se namelang nokaneng mongobong: ha se tšabe letho ha mocheso o fihla, mahlaku a sona a tla sala a nts’a le matalana: le ka selemo sa komello ha se khathatsehe ‘me ha se lese ho beha litholoana.
Ha ho ntho e mano joaloka pelo ea motho; bobe ba eona ha bo phekolehe. Ke mang ea ka e tsebang hantle? ‘Na Morena, ke ‘na feela ea hlahlobang pelo, le ea nonyang maikutlo, ke tle ke putse motho ho ea ka metsamao ea hae le ka mesebetsi eo a e entseng.
PESALEMA 1 (1-4.6. R. Ps 39,5)
HO LEHLOHONOLO MOTHO EA BEHANG TŠEPO EA HAE HO MORENA.
Ho lehlohonolo motho,
ea sa lateleng keletso ea ba khopo,
ea sa beheng le leoto tseleng ea baetsalibe,
ea sa luleng mokhatlong oa basomi;
empa e le ea khahloang ke molao oa Morena,
ea inahanang ka molao oo nyene le bosiu.
O ka sefate se hlonngoeng pel’a mehloli ea metsi,
se behang litholoana ka nako ea teng,
seo mahlaku a sona a sa poneng;
mesebetsi eohle ea hae ea atleha.
Ha se ntho e tšoanang le ho ba khopo,
bona ba kang ‘moko o fefoloang ke moea;
hobane Morena o tseba tsela ea ba lokileng,
athe tsela ea ba khopo ea timetsa.
Ho baloa Evangeling e halalelang e ngotsoeng ke Luka (16,19-31)
“U fumane tse monate, athe Lazaro eena o fumane tse babang; joale eena oa tšelisoa, ha oena u hlokofatsoa.”
Ka nako eo, Jesu a re ho bafarisi: ho ne ho le teng motho oa morui, ea neng a apara tse seletjane le tse entsoeng ka lesela le bonolo. O n’a itjella, a inoella tse hlabosehang ka matsatsi “ohle. Ha mofutsana e mong ea bitsoang Lazaro a n’a kokomala pel’a monyako oa ntlo ea hae, a berehile liso ‘mele kaofela. O n’a khaletse ho thiba lephako ka makumane a oang tafoleng ea morui, empa ho ne ho se ea mo fang ‘ona. Lintja le tsona li ne li ee li tle li mo nyeke liso.
Ha etsahala hore mofutsana a shoe, ‘me manyeloi a mo nkela sefubeng sa Abrahama. Morui le eena a shoa ‘me a patoa liheleng. Eare ha a lelaletsa mahlo holimo a le lihlorisong, a bona Abrahama, le Lazaro sefubeng sa hae, a ba shebela hole. A hoeletsa, a re: Ntate Abrahama, nkhauhele, u romele Lazaro, a ine ntlha ea monoana oa hae metsing a tl’o mpholisa leleme, hobane kea hlokofatsoa malakabeng ana.
Empa Abrahama a re ho eena: Ngoan’a ka, hopola hore uena u fumane tse monate bophelong ba hao, athe Lazaro eena o fumane tse babang. Joale tjena eena oa tšelisoa, ha uena u hlokofatsoa. Ho feta moo, ho na le mohohlohali pakeng tsa rona le lona, hoo ba ka ratang ho tloha mona ho tšelela ka ho lona ba hlolehang, le ba tlohang ka ho lona ba ke keng ba tšelela ka koano.
Eaba morui o re: Ha ho le joalo, kea u rapela, ntate, mo romele tlung ea ntate, hobane ke na le bana beso ba bahlano. A ba hlokomelise, esere le bona ba tla qalong ena ea hlokofatso. Abrahama a re: Ba na le Moshe le Baprofeta, ba ba mamele. Eena a fetola, a re: Oee, ntate Abrahama, empa ha eba e mong oa bafu a ka ea ho bona, ba ka baka. Empa Abrahama a re ho eena: Ha eba ba sa utloe Moshe le Baprofeta ba ke ke ba kholoa, leha e mong oa bafu a ka tsoha.
