Moeletsi oa Basotho Beke ea bobeli ea Karisima
Laboraro
Ho baloa Bukeng ea Moprofeta Jeremia. (18,18-20)
“Tloong, re rere Jeremia.”
Batho ba ile ba buisana, ba re: Tloong, re rere Jeremia, hobane ho tla ‘ne ho be le baprista ho ruta, le ba bohlale ho eletsa, le baprofeta ho phatlalatsa molaetsa. Tloong re mo feliseng ka liketselletso, ‘me re se ke ra ela polelo efe kapa efe ea hae hloko.
Uena, Morena, ak’u nkele hloko, u k’u utloe le se buoang ke ba ntoantšang. Na ho ka busetsoa bobe bakeng la botle, ha e le moo ba ncheketse lemena? Hopola kamoo ke neng ke ema pel’a hao kateng ho ba buella, ho khelosa khalefo ea hao ho bona.
PESALEMA 30 (5-6.14-16. R. 17)
U MPHOLOSE KA MOHAU OA HAO, MORENA.
U ntšoasolla lerabeng leo ba nchehileng ka lona,
hobane ke uena ea nqobeletsang, Morena.
Ke beha moea oa ka matsohong a hao;
ke uena ea ntopollang, Morena, Molimo oa ‘nete.
Ke fetohile sesomo ho lira tsohle tsa ka,
ke se ke nyonyeha ho baahisani,
ke se ke ka koko ho ba ntsebang,
ba mponang mapatlelong, ba mpaleha.
Ha e le ‘na, ke tšepile uena, Morena,
ke re: Ke uena Molimo oa ka.
Litšiu tsa ka li matsohong a hao;
u ‘namolele liatleng tsa lira le tsa bahlorisi ba ka.
Ho baloa Evangeling e halalelang e ngotsoeng ke Matheus (20,17-28)
“Ba tla mo ahlolela lefu.”
Ka nako eo, ha Jesu a nts’a nyolohela Jerusalema, a nka barutuoa ba leshome le metso e ‘meli lekunutu, a re ho bona: Lea bona, re nyolohela Jerusalema, moo Mor’a motho a tla neheloa baprista ba baholo le bangoli, ba tla mo ahlolela lefu, ba mo nehele balichaba hore a sonngoe, a shapuoe a be a thakhisoe, empa ka letsatsi la boraro o tla tsoha.
Eaba ‘m’a bara ba Zebedea o tla ho Jesu le bara ba hae, a mo khumamela ho mo kopa ho hong. Jesu a re ho eena: U batla’ng na? A mo araba, a re: E re bara bana ba ka ba babeli ba lule ‘musong oa hao, e mong ka letsohong la hao le letona, e mong ka ho le letšehali.
Empa Jesu a fetola, a re: Ha le tsebe seo le se kopang. Na le ka noa senoelo seo ke tla se noa na? Ba re: E, re ka etsa. A re ho bona: Senoelo sa ka, ke ‘nete, le tla se noa. Empa ha e le ho lula ka letsohong la ka le letona kapa ho le letšehali, ha se ‘na ea ka le nehang hona, ho tla nehoa ba ho lokiselitsoeng ke Ntate.
Ha baapostola ba bang ba utloa hona, ba fella bara ba babeli ba Zebedea pelo. Jesu a ba bitsetsa ho eena, ‘me a re: Lea tseba hore lichabeng marena a rena ‘me ba ka sehlohong ba bontša matla a bona. Ha e le ho lona ho se ke ha e-ba joalo, empa har’a lona ea ratang ho ba moholo e be mohlanka oa lona ‘me ea ratang ho ba pele, e be mosebeletsi oa lona, joaloka Mor’a Motho ea sa kang a tla ho sebeletsoa, empa ho sebeletsa le ho neela bophelo ba hae ho ba topollo ea ba bangata.
