Moeletsi oa Basotho Beke ea bobeli ea Karisima
‘Mantaha
Ho baloa Bukeng ea Moprofeta Daniele. (9,4-10)
“Re entse sebe, re fositse.”
Morena, uena Molimo ea matla ‘me lokelang ho tšajoa, u tšepahala selekaneng ‘me u mohau ho ba ho u ratang ‘me ba bolokang melao ea hao. Re entse sebe, re fositse, re entse bokhopo, re u fetohetse, ra furalla melao le litaelo tsa hao. Ha rea ka ra mamela bahlanka ba hao, baprofeta ba buileng lebitsong la hao, ba buile le likhosi tsa rona, mahosana a rona, bo-ntat’a rona le sechaba kaofela sa naha ena.
Ho loka ke hoa hao Morena, athe ho apareloa ke lihlong, joaloka kajeno, ke hoa rona, hoa batho ba Juda, baahi ba Jerusalema le Israele kaofela, hoa bohle ba haufi le ba hole, linaheng tsohle tseo u ba qhalantseng har’a tsona, ka baka la ho hloka bots’epehi ha bona ho uena.
Morena, ho apareloa ke lihlong ho lokela rona, likhosi tsa rona, mahosana a rona le bo-ntat’a rona, hobane re u sitetsoe ka libe tsa rona. Empa mohau le tšoarelo li lokela Morena Molimo oa rona, leha rona re mo fetohetse. Ha rea ka ra mamela Lentsoe la Morena Molimo oa rona, ha rea tsamaea ka ho ea ka melao, eo a re behetseng eona ka bahlanka ba hae baprofeta.
PESALEMA 78 (8.9.11.13. R. Ps 102,10)
MORENA, U SE KE UA RE TŠOARA KAMOO LIBE TSA RONA LI LOKELANG KATENG.
Se re balle melato ea bo-ntat’a rona,
u mp’u potlakele ho re khahlametsa.
U re khahlametse ka mehauhelo ea hao,
hobane re kokobelitsoe hampe.
Ak’u re thuse, Molimo, mopholosi oa rona,
ho tlotlisa lebitso la hao;
u re lopolle ‘me u re tšoarele libe tsa rona
ka baka la lebitso la hao.
Poboli ea batlamuoa e ke e fihle ho uena;
ka letsoho le matla la hao,
pholosa ba ahloletsoeng lefu,
Rona sechaba sa hao, mohlape oa makhulo a hao,
re tla u boka ka mehla.
Ho baloa Evangeling e halalelang e ngotsoeng ke Luka (6,36-38)
“Tšoarelang, le lona le tla tšoareloa.”
Ka nako eo, Jesu a re ho barutuoa ba hae: E-bang mohau, joaloka ha Ntat’a lona a le mohau. Le se ke la ahlola, le lona ha le tl’o ahloloa; le se ke la tsoa ba bang, le lona ha le tl’o tsuoa.
Tšoarelang, le lona le tla tšoareloa. Fanang ‘me le tla fuoa: le tla tšelloa kobong ea lona tekanyo e ntle, e katiloeng, e hlohliloeng, e tletseng thabana. Hobane ka tekanyo eo le lekanyelitseng ba bang ka eona, le lona le tla lekanyetsoa ka eona.
