Moeletsi oa Basotho Beke ea pele ea Karisima
Labohlano
Ho baloa Bukeng ea Moprofeta Ezekiele. (18,21-28)
“Na nka khahloa ke lefu la ea khopo, e seng se nkhahlang ke hore a khutle metsamaong ea hae ‘me a phele?”
Ke sena seo Morena a se bolelang: Ha ea khopo a ka bakela libe tseo a li entseng a boloka melao eohle ea ka ‘me a etsa hoo e leng toka le tšoanelo, o tla phela, a ke ke a shoa. A ke ke a balloa leha se le seng sa libe tseo a li entseng; o tla phela ka baka la liketso tse lokileng tsa hae. Na nka khahloa ke lefu la ea khopo, ho rialo Morena, e seng se nkhahlang ke hore a khutle metsamaong ea hae ‘me a phele?
Empa le teng, ha ea lokileng a ka furalla ho loka ha hae ‘me a etsa se fosahetseng, a etsa tse nyonyehang joaloka tse etsoang ke ea khopo, ebe a ka phela? Ha ho ketso le e ‘ngoe e lokileng ea hae e tla hopoloa. Ka baka la ho lahla botšepehi le ho etsa sebe, o tla shoa.
Lona le emeletse ho re: “Tsela ea Morena ha ea nepahala.” Mamelang he, lona ba ntlo ea Israele! Na ke tsela ea ka e sa nepahalang, ha se ea lona e sa nepahalang? Ha ea lokileng a ka furalla ho loka ha hae, a etsa se fosahetseng ‘me a shoa, o tla shoa ka baka la phoso ea hae. Athe ha ea khopo a ka furalla bokhopo boo a bo entseng ‘me a etsa hoo e leng toka le tšoanelo, eena o tla pholosa bophelo ba hae. Ka hobane o ile a bakela libe tseo a li entseng, ka ‘nete o tla phela, a ke ke a shoa.
PESALEMA 129 (1-8. R. 3)
MORENA, HA U SA LEBALE MELATO, KE MANG EA KA PHELANG, MORENA?
Morena, ke hoeletsa ho uena ke le botebong,
Morena, ak’u mamele lentsoe la ka,
ak’u thehe tsebe,
ha ke hlahisa thapeli ea ka.
Morena, ha u sa lebale melato,
ke mang ea ka phelang, Morena?
Empa ho uena tšoarelo e teng,
ka hona batho b’a u hlompha.
Ke behile tšepo ea ka ho Morena,
Moea oa ka o tšepile lentsoe la hae.
Moea oa ka o lebella Morena
Ho feta balebeli ba lebella meso.
Hobane mohau o teng ho Morena,
le matla a ho lopolla a mangata ho eena.
Ke eena ea tla lopolla Israele
makhopong ohle a hae.
Ho baloa Evangeling e halalelang e ngotsoeng ke Matheus (5,20-26)
“U qale ka ho ea boelana le ngoan’eno.”
Ka nako eo, Jesu a re ho barutuoa ba hae: Ntle le hore ho loka ha lona ho fete ha bangoli le ha bafarisi, le ke ke la kena ‘Musong oa Maholimo.
Le utloile hore ho itsoe ho baholo-holo: U se ke ua bolaea; ‘me ea tla bolaea o tla lokeloa ke kahlolo. Empa ‘na, kea le joetsa: Mang le mang ea halefelang ngoan’abo o tla lokeloa ke kahlolo. Ea tla re ho ngoan’abo: “Sehole tooe,” o tla tlameha ho ikarabella khotla. ‘Me ea tla re: “Lehlanya tooe,” o tla lokeloa ke mollo oa lihele.
Ka baka leo ha u hlahisa nyehelo ea hao aletareng, ‘me hona teng u hopola hore ngoan’eno o lla ka uena, siea nyehelo ea hao hona moo, pel’a aletare, ‘me u qale ka ho ea boelana le ngoan’eno; u nt’o khutla ho hlahisa nyehelo ea hao.
Phakisa u e’o utloana le eo le tsekisanang le eena, le sa le tseleng, esere mohlomong eo le tsekisanang le eena a u nehela moahloli, moahloli a u nehela molebeli, ua hlahleloa chankaneng. Ruri, kea u bolella, ha u ka ke ua tsoa teng ho fihlela ha u lefile cheletana ea qetello.
