Moeletsi oa Basotho Laboraro la Molora
Ho baloa Bukeng ea Moprofeta Joele. (2,12-18)
“Le tabole lipelo tsa lona, e seng liaparo tsa lona.”
Hona joale, ho rialo Morena, khutlelang ho ‘na ka pelo tsa lona, ka boitimo, ka meokho le ka lillo. Le tabole lipelo tsa lona, e seng liaparo tsa lona; le khutlele ho Morena Molimo oa lona, hobane o mosa, o lereko, o na le mamello, o mohau haholo, o fetola morero oa hae oa ho otla. Mohlomong a ka ithapela, a fetola morero oa hae, ‘me a siea tlhohonolofatso mehlaleng ea hae, e leng lijo le lino tse ka nyeheloang Morena Molimo oa lona.
Letsang terompeta Sione, khethang letsatsi la ho itima, epang pitso, phuthang sechaba, behang letsatsi la phutheho, bokellang maqheku, phuthang bana le masea. Monyali a tsoe leqatheng la hae, le monyaluoa phaposing ea hae.
Pakeng tsa mathule a Tempele le aletare, ho lle baprista, bahlanka ba Morena, ba ke ba re: “Hauhela sechaba sa hao, Morena, u se ke ua etsa lefa la hao sekhobo le sesomo har’a lichaba. Ba merabe e meng ba ka ba le lebaka lefe la ho re: O kae na, Molimo oa bona?” Morena a boulela naha ea hae, ‘me a hauhela sechaba sa hae.
PESALEMA 50 (3-6.12-13.14 le 17. R. 3)
U RE HAUHELE, MORENA, HOBANE RE U SITETSOE
Nkhauhele, oho Molimo, ka lerato la hao;
ka baka la boholo ba mehauhelo ea hao
u hlakole melato ea ka.
Ntlhatsoe, u ntlhatsoisise phoso ea ka,
u ntlhoekise sebe sa ka.
Hobane ke ipona molato,
‘me sebe sa ka ke sitoa ho se lebala.
Ke entse sebe, ke sitetsoe uena u inotsi,
ke entse ho leng hobe mahlong a hao.
Mpopele pelo e hloekileng, oho Molimo,
nchafatsa ka ho ‘na moea o tiileng.
U se ntahlele hole le sefahleho sa hao,
u se nkamohe moea o halalelang oa hao.
U mpuseletse thabo ea pholoho ea hao,
ke tle ke tšehetsoe ke moea o motle.
Morena, ahlamolla molomo oa ka,
‘me leleme la ka le tla bolela lithoko tsa hao.
Ho baloa Lengolong la Bobeli la Moapostola Paulosi ho Ba-Korinthe. (5,20-6,2)
“Boelanang le Molimo …. Joale nako ea mohau e fihlile.”
Bana beso! Re maqosa a Kriste, joaloka hoja ke Molimo ea khothatsang ka rona. Lebitsong la Kriste rea le kopa: boelanang le Molimo. Hobane Ea neng a se na sebe, Molimo o ile a mo nkella le baetsalibe ka baka la rona, e le hore ka eena re abeloe ho loka ha Molimo.
Rea le khothatsa, re le batlatsi ba Molimo, hore le se ke la amohella mohau oa Molimo lefeela. Hobane o itse: Ke u utloile ka nako e behiloeng ea mohau oa ka, ka u phallela tsatsing la pholoho. Joale nako ea mohau e fihlile, letsatsi la pholoho e se e le lona.
Ho baloa Evangeling e halalelang e ngotsoeng ke Matheus (6,1-6.16-18)
Ntat’ao ea bonang sephiring o tla u buseletsa.
Ka nako eo, Jesu a re ho barutuoa ba hae; hlokomelang le se etse liketso tse lokileng tsa lona mahlong a batho hore le bonoe ke bona; ho seng joalo, le ke ke la fumana moputso ho ntat’a lona ea maholimong.
Ka baka leo, ha u etsa mpho ea mohau, u se ke oa letsa phala, joalokaha baikaketsi ba etsa, matlung a thapelo le litseleng, hore ba tle ba rorisoe ke batho. Ruri, kea le bolella, ba se ba amohetse moputso oa bona. Empa uena ha u etsa mpho ea mohau, letsoho la hao le letšehali le se ke la tseba se etsoang ke le letona, ketso ea hau ea mohau e tle e be sephiring; ‘me Ntat’ao ea bonang sephiring o tla u buseletsa.
Hape, ha le rapela, le se ke la tšoana le baikaketsi, ba ratang ho rapela ba eme matlung a thapelo le makopanong a litsela, hore ba bonoe ke batho. Ruri, kea le bolella, ba se ba amohetse moputso oa bona. Empa uena ha u rapela, kena kamoreng ea hao, u koale monyako, u nt’o rapela Ntat’ao ea leng teng sephiring; ‘me Ntat’ao ea bonang sephiring o tla u buseletsa.
Hape-hape, ha le itima lijo le se ke la itlhonamisa, joaloka baikaketsi, ba sosobanyang lifahleho tsa bona, ba tle hle ba bonahale ho batho hore ba itima. Ruri, kea le bolella, ba se ba amohetse moputso oa bona. Empa uena ha u itima, u itlotse hlooho ‘me u iphotle sefahleho, u tle u se ke ua bonahala ho batho hore ua itima, ha e se ho Ntat’ao ea leng teng sephiring: ‘me Ntat’ao ea bonang sephiring o tla u putsa.
