Moeletsi oa Basotho ‘Mantaha
Ho baloa Lengolong la Moapostola Jakobo. (1,1-11)
“Teko ea tumelo ea lona e tsoala mamello, e le hore le phethehe, le sa haelloe ke letho.”
Jakobo, mohlanka oa Molimo le oa Morena oa rona Jesu Kriste ho meloko e leshome le metso e ‘meli e qhalakaneng: Kea le lumelisa.
Le ke le lekanye, bana beso, hore le tšoanetse ho thaba haholo ha le nonngoa ka mekhoa e mengata. Etsoe le tseba hore teko ea tumelo ea lona e tsoala mamello. Empa mamello e be le mesebetsi e phethehileng, e le hore le tle le phethehe, le tlale, le sa haelloe ke letho.
Ha e mong oa lona a hloka bohlale, a ke a bo kope ho Molimo ea fanang ho bohle haholo, a sa khanane, ‘me o tla fuoa. A mpe a kope ka tumelo, a sa lika-like le hanyenyane, etsoe ea lika-likang eka leqhubu la leoatle le tsukutloang, le khahleloang ka ‘nqa tsohle ke moea. Motho ea joalo a se ke a hopola hore o tla fuoa letho ke Morena. Ke motho ea pelo-peli ea feto-fetohang metsamaong eohle ea hae.
Ngoan’abo rona e leng mofutsana a ke a ithorisetse boholo ba hae; athe morui eena a ithorise ka bonyenyane ba hae, hobane o tla feta joaloka palesa ea joang. Efela letsatsi le ee le chabe ka mocheso oa lona, le omise joang, palesa ea bona e oe, ‘me botle ba sebopeho sa eona bo senyehe. Le eena morui o tla pona joalo metsamaong ea hae.
PESALEMA 118 (67.68.71.72.75.76. R. 77)
MORENA, MOSA OA HAO O KE O TLE HO ‘NA ‘ME KE TLA PHELA.
Morena, pele ke sotleha, ke ne ke khelohile,
empa joale ke ela pallo ea hao hloko.
Uena ea molemo ‘me ea fanang,
nthute thato ea hao.
Ho molemo ha ke sotlehile,
e le hore ke ithute thato ea hao.
Molao o tsoang molomong oa hao o molemo ho ‘na
ho feta leruohali la gauda le silvera.
Morena, ke tseba hore likahlolo tsa hao li lokile,
‘me leha u ntšotlile e ne e le ka tšoanelo.
Mohau oa hao o ke o ntšelise,
ka ho ea ka pallo ea hao ho mohlanka oa hao.
Ho baloa Evangeling e halalelang e ngotsoeng ke Mareka. (8,11-13)
“Moloko ona o kopela’ng pontso?”
Ka nako eo, Bafarisi ba tla ‘me ba qala ho arabisana le Jesu. Ka ho mo leka, ba kopa ho eena pontšo e tsoang leholimong. Jesu a sisimoha moeeng, a re: Moloko ona o kopela’ng pontšo? Ruri kea le bolella, moloko ona o ke ke oa nehoa pontšo.
A ba tlohela, a boela a kena sekepaneng ‘me a tšelela mose oane.
