Moeletsi oa Basotho Beke ea pele ea Karisima
Labobeli
Ho baloa Bukeng ea Moprofeta Isaia. (55,10-11)
“Lentsoe la ka le tla etsa thato ea ka.”
Ke sena seo Morena a se bolelang: Joaloka ha pula le lehloa li theoha leholimong, ‘me li sa khutlele teng li e-s’o thophothele lefatše, hore le tsebe ho hlahisa limela, le tle le fumantše mojali peo, le bohobe ho ea jang, le tla ba joalo le lona lentsoe la ka le tsoang molomong oa ka, le ke ke la khutlela ho ‘na le le feela, empa le tla etsa thato ea ka, ‘me le tla phetha thomo ea lona.
PESALEMA 33 (4-7,16-19R/. 18)
MOLIMO O NTŠA BA LOKILENG MATŠOENYEHONG ‘OHLE A BONA.
A re tlotliseng Morena, rona bohle,
bohle a re phafeng lebitso la hae hammoho.
Ke batlile Morena ‘me a nkaraba;
a ba a mpholosa matsoalong ‘ohle a ka.
Mo talimeng, ‘me lifahleho tsa lona li tla khanya,
le ke ke la hlajoa ke lihlong.
Mohloki ke eo a hoeletsa; Morena a mo utloa,
‘me a mo pholosa litlallong tsohle tsa hae.
Mahlo a Morena a holim’a ba lokileng,
o sekehetse mehoo ea bona tsebe.
Sefahleho sa Morena se halefetse ba etsang bobe
ho ba hlakola lefatšeng
hore ba hopoloa.
Ha ba lokileng ba hoelehetsa, Morena oa ba utloa;
O ba ntša matšoenyehong ohle a bona.
Morena o haufi le ba pelo li matetetso,
o pholosa ba meea e imetsoeng.
Ho baloa Evangeling e halalelang e ngotsoeng ke Matheus (6,7-15)
“Ha ho le joalo, lona le rapele joana.”
Ka nako eo, Jesu a re ho barutuoa ba hae: Ha le rapela, le se ke la ea lolo-lolo joaloka bahetene, ba hopolang hore ba tla utluoa ka baka la mantsoe bongata. Lona le se ke la ba etsisa, hobane Ntat’a lona o se a ntse a tseba tseo le li hlokang, pele le mo kopa. Ha ho le joalo, lona, le rapele joana:
Ntat’a rona ea maholimong,
Lebitso la hao le halaletsoe,
‘Muso oa hao o tle,
Thato ea hao e etsoe lefatšeng joaloka leholimong.
U re fe kajeno bohobe ba rona ba letsatsi le leng le le leng;
u re tšoarele libe tsa rona.
joaloka ha le rona re tšoaretse ba re sitetsoeng;
‘me u se ke ua lumella hore re oele molekong
u mpe u re ntše bobeng.
Haeba le fela le tšoarela batho liphoso tsa bona, ntat’a lona ea maholimong o tla le tšoarela le lona, athe haeba le sa tšoarele batho, ntat’a lona le eena a ke ke a tšoarela liphoso tsa lona.
