Moeletsi oa Basotho Labohlano
Ho baloa Bukeng ea Pele ea Likhosi. (11,29-32;12,19)
Israele e ikarohanya le ntlo ea Davida.
Ka nako eo, ha etsahala hore ha Jeroboame a e-tsoa Jerusalema moprofeta Ahija oa Shilo a teana le eena tseleng. Ahija o n’a apere seaparo se secha. Ba ne ba le babeli feela naheng. Ahija a hlobola seaparo se secha seo a se apereng, a se tabola likoto tse leshome le metso e ‘meli.
Eaba o re ho Jeroboame: Inkele likoto tse leshome, hobane ke sena seo Morena, Molimo oa Israele a se bolelang: Ke tla hlotha ‘muso matsohong a Salomone, ke u nehe meloko e leshome ea oona. Eena o tla salloa ke leloko le le leng, ka baka la Davida mohlanka oa ka, le ka baka la Jerusalema, motse oo ke ikhethetseng oona har’a meloko eohle ea Israele.
Ka tsela ena Israele ea ikarohanya le ntlo ea Davida, ho fihlela kajeno.
PESALEMA 80 (10-15. R. 11 le 9)
KE ‘NA MORENA MOLIMO OA HAO, U MAMELE LENTSOE LA KA.
Ha hao ho se be le molimo o sele,
u se ke ua khumamela molimo o sa tsebisahaleng.
Ke ‘na Morena Molimo oa hao,
ea u ntšitseng naheng ea Egepeta;
ahlama haholo, ke tle ke tlatse molomo oa hao.
Empa sechaba sa ka ha sea mamela lentsoe la ka,
Israele ha a ka a ‘natsa.
Ka ba tlohela ka baka la lipelo tse manganga tsa bona,
ba tle ba tsamaee ka ho ea ka merero ea bona.
Hoja sechaba sa ka se ne se ka ‘mamela,
hoja Israele a ne a ka tsamaea tseleng tsa ka,
nka be ke kokobetsa lira tsa hae hang-hang,
ke isa ba mo loantšang letsoho.
Ho baloa Evangeling e halalelang e ngotsoeng ke Mareka. (7,31-37)
O thibolotse bo tsebe-tutu, o buisitse limumu.
Ka nako eo, Jesu a tloha naheng ea Tire, a feta ka tsela ea Sidone a leba leoatleng la Galilea, a haola naha ea Dekapolise ka lehare.
Ba tlisa semumu-tsebe-tutu ho eena, ‘me ba mo rapela hore a ke a se behe letsoho. Jesu a se nkela thoko ho bongata, a kenya menoana ka litsebeng tsa sona, a tšoela mathe, ‘me a ama leleme la sona. A nt’o lelalla leholimong, a sisimoha ‘me a re ho sona: Effatha! ke ho re: Thiboloha! Eaba litsebe tsa sona li’a thiboloha, hang leleme la sona la raroloha, ‘me sa qala ho bua hantle.
Jesu a ba laela hore ba se ke ba bolella motho; empa hona ha a ba laetse ka thata joalo, ea ba moo ba bolelang le ho feta. Ba ne ba hloletsoe ka mokhoa o makatsang, ba re: O entse tsohle hantle, o thibolotse bo-tsebe-tutu, o buisitse limumu.
