Moeletsi oa Basotho Laboraro
Ho baloa Bukeng ea Pele ea Likhosi. (10,1-10)
Mofumahali oa Sheba a bona bohlale bohle ba Salomone.
Matsatsing ao, hoba mofumahali oa Sheba a utloe tsa botumo ba Salomone, a tla mo nonya ka lilotho. A fihla Jerusalema a tsamaea le letšoele le leholo, a le likamele tse bofileng linoko le gauda e ngata haholo le mahakoe a bohlokoa. Eitse ha a fihla ho Salomone, a molella tsohle tse pelong ea hae. Salomone a arabela tsohle tsa hae, ho se le e ‘ngoe eo khosi e sitiloeng ho e araba.
Eare ha mofumahali oa Sheba a bona bohlale bohle Salomone, ntlo eo a e ahileng, lijo tsa tafole ea hae, matlo a bahlanka ba hae, makhethe a basebeletsi ba hae le liaparo tsa bona, baabi ba lino, a bona le mahlabelo a licheso a neng a nyeheloa ka Tempeleng ea Morena, a haroha letsoalo.
A re ho khosi: Athe seo ke se utloileng naheng ea ka uena le ka bohlale ba hao efela e ne e le ‘nete! empa ke ne ke sa lumele, ho fihlela ke ba ke e-tla mona, ke ipontša ka mahlo a ka. Ruri seo ke se boleletsoeng, ha se amantše le ho amantša. Ka bohlale le ka maruo u feta hole seo ke se utloileng ka bo-ba-re.
Ho lehlohonolo basali ba hao, ho lehlohonolo bahlanka bana ba hao, ba hlolang ba eme pel’a hao, ba ntse ba mametse bohlale ba hao! Ho bokoe Morena, Molimo oa hao, ea khahliloeng ke uena, ‘me ea u behileng terone ea Israele! Ere ka ha Morena a rata Israele kamehla, o u behile khosi, hore u sebetse ka toka le tšoanelo.
Eaba o fa khosi litalenta tse lekholo le mashome a mabeli tsa gauda, linoko tse ngata haholo le mahakoe a matle. Ha hoa ka ha hlola ho tlisoa le ka mohla linoko tse ngata joaloka tseo mofumahali oa Sheba a li fileng Khosi Salomone.
PESALEMA 36 (5-6.30-31.39-40. R. 30)
MOLOMO OA EA LOKILENG O NTŠA PUO TSA BOHLALE
Beha sohle se u hlahelang ka pel’a Morena,
u be u mo tšepe, ke eena ea tla bona se ka etsoang.
A totobatse joaloka leseli ho loka ha hao,
Le litokelo tsa hao joaloka motšeare oa lengeta.
Molomo oa ea lokileng o ntsa puo tsa bohlale,
Le leleme la hae le bolela toka;
Molao oa Molimo oa hae o ka pelong ea hae,
‘me mehato ea hae e ke ke ea rerekela.
Pholoho ea ba lokileng e tsoa ho Morena;
ke eena setšabelo sa bona ka nako ea matšoenyeho.
Morena oa ba thusa ‘me oa ba lopolla,
oa ba pholosa ha ba tšabela ho eena.
Ho baloa Evangeling e halalelang e ngotsoeng ke Mareka. (7,14-23)
Se tsoang ho motho ke sona se mo silafatsang.
Ka nako eo, Jesu a boela a bitsetsa letšoele ho eena, ‘me a re ho lona: ‘Mameleng bohle, ‘me le be le utloisise. Ha ho letho le leng ka ntle ho motho, leo ekareng ha le kena ka ho eena, la mo silafatsa; empa ke se tsoang ka ho motho se mo silafatsang. Ea nang le litsebe ho utloa a ke a utloe!
Eitse ha a tlohile letšoeleng ‘me a se a kene katlung barutuoa ba hae ba ‘motsa papiso eo. A re: Ana le lona le hloka kutloisiso tjee? Ha le utloisise hore ntho efe le efe e tsoang ka ntle ho motho ha e kene pelong ea hae, empa e ea ka mpeng, ‘me e tsoela mohlabaneng? Ka ho rialo o ne a bolela hore lijo tsohle li hloekile. A tsoela pele, a re: Lintho tsohle tse tsoang ho motho, ke tsona tse mo silafatsang: hobane ke kahare, lipelong tsa batho, moo ho tsoang mehopolo e mebe, botsoa, bosholu, lipolao, bohlola, meharo, makhopo, bomenemene, tse hlabisang lihlong, mohono, liketseletso, boikhohomoso le botlaopa. Mekhoa ena e mebe e tsoa kahare ho motho ‘me ke eona e silafatsang motho.
