Moeletsi oa Basotho Labobeli
Ho baloa Bukeng ea Bobeli ea Samuele. (6,12-15.17-19)
Davida le ba ntlo eohle ea Israele ba tlisa areka ea Morena ka litlatse.
Matsatsing ao, Davida a ea lata areka ea Molimo tlung ea Obede-Edomo, a e tlisa motseng oa Davida ka nyakallo. E ne e re ha bajari ba areka ea Morena ba tsamaile mehato e tšeletseng, ho n’o etsoa sehlabelo sa khomo le sa namane e nonneng.
Ha e le Davida, o n’a hobelaka, a b’a ‘n’a phethohake ka pel’a areka ea Morena, a itlamme thekeng ka efoda ea line. Davida le ba ntlo eohle ea Israele ba tlisa areka ea Morena ka litlatse, ba letsa literompeta.
Areka ea Morena ea tlisoa, ea fihla ea behoa tulong tsa eona, ka har’a tente eo Davida a neng a e hlometse eona. Davida a nt’o nyehela Morena mahlabelo a licheso le a khotso, a hlohonolofatsa sechaba ka lebitso la Morena oa makhotla. A ba a abela sechaba sohle, letšoelehali la banna le basali ba Ba-lsraele, e mong le e mong sephaphatha sa bohobe, leqa la nama le polokoana ea morara o ommeng. Sechaba sa nt’o qhalana, e mong le e mong a ikela ha hae.
PESALEMA 23 (7-10.)
KE MANG KHOSI EO E TLOTLEHANG? KE MORENA.
Bulehang, lona mamati, ipuleng ka bolona,
lona mamati a bosafeleng,
ho tle ho kene Khosi e tlotlehang.
Ke mang Khosi eo e tlotlehang?
Ke Morena ea matla, ea sa hloloeng,
Morena ea sa hloloeng ntoeng,
Bulehang, lona mamati, ipuleng ka bolona,
lona mamati a bosafeleng,
ho tle ho kene Khosi e tlotlehang.
Ho baloa Evangeling e halalelang e ngotsoeng ke Mareka. (3,31-35)
Ea etsang thato ea Molimo ke eena ngoan’eso, le khaitseli ea ka, ebile ke ‘mè.
Ka nako eo, ‘m’a Jesu le bana babo ba fihla, ba ema kantle; ba romela hore a bitsoe. Matšoele a mo potileng a re ho eena: Hela, ‘m’ao le bana beno ke bana kantle, baa u batla. A ba araba, a re: ‘Mè ke mang, hona bana beso ke bo-mang?
Eaba o ea ka mahlo bohle ba lutseng ba mo teetse hare, a re: ‘Mè le bana beso ke bana; hobane ea etsang thato ea Molimo ke eena ngoan’eso, ke khaitseli ea ka, ebile ke ‘m’e.
