La 10 Pherekhong 2024

Laboraro

Ho baloa Bukeng ea Pele ea Samuele. (3,1-10.19-20)

Bua, Morena: mohlanka oa hao o mametse

Matsatsing ao, Moshanyana Samuele o n’a sebeletsa Morena tataisong ea Eli. Mehleng eo Morena o n’a bua le lipono li ne li tšoha li hlahile. Joale, ka tsatsi leng, Eli o n’a robetse ka kamoreng ea hae. Mahlo a hae a n’a se a qalile ho foufala, a s’a sa bone. Lebone la Molimo le ne le e-s’o time ‘me Samuele o n’a robetse tempeleng ea Morena, moo areka ea Molimo e neng e le hona teng. Eaba Morena o bitsa Samuele. Eena a araba, a re: Ke ‘na enoa. A nt’o mathela ho Eli, ‘me a re: U mpitsitse, ke ‘na enoa. Ha kea u bitsa, ho rialo Eli; tsa m’o robala! A khutla ‘me a robala.

Morena a boela a bitsa, a re: Samuele! Samuele a tsoha, a ea ho Eli ’me a re: U mpitsitse, ke ‘na enoa. Ha kea u bitsa, ngoan’a ka, ho rialo Eli; tsa m’o robala! Samuele o ne a e-s’o tsebe Morena ‘me o ne a e-s’o senoleloe Lentsoe la Morena.

Morena a boela a bitsa Samuele la boraro. Samuele a tsoha, a ea ho Eli ‘me a re: U mpitsitse, ke ‘na enoa. Moo, Eli a lemoha hore ke Morena ea bitsang mohlankana. Tsa m’o robala, a rialo; e tle re ha u bitsoa, u re: Bua Morena: mohlanka oa hao o mametse. Samuele a khutla ‘me a robala phaposing ea hae.

Eaba Morena oa kena, o ema pel’a hae, ‘me o ‘mitsa joaloka pele, o re: Samuele Samuele! Samuele a araba,

a re: Bua Morena : mohlanka oa hao o mametse.

Samuele a hola, Morena a e-na le eena. Ha a ka a lahla letho la tseo Morena a neng a mo boleletse tsona.

Israele eohle, ho tloha Dane ho ea kena Beersheba, ea tseba hore Samuele o behiloe moprofeta oa Morena.

PESALEMA 39       (2,5.7-10. 8. 9)

KE ‘NA EO! KE TLA HO PHETHA THATO EA HAO, MORENA.

Ke ile ka lebella Morena ka tšepo e kholo,

a retelehela ho ‘na, a sekehela mohöo oa ka tsèbè;

Ho lehlohonolo motho

ea behang tšepo ea hae ho Morena,

ea sa khemeng le baikhantši le ba sesang leshanong.

Ha u khahloe ke mahlabelo, leha e le linyehelo,

empa u nthibolotse litsèbè;

ha u hloke licheso le mahlabelo bakeng la sebe;

ke ha ke re: Ke ‘na eo, kea tla!

Bukeng ho ngotsoe taelo

ea hore ke phethe thato ea hao.

Molimo oa ka, lerato la molao oa hao

le botebong ba pelo ea ka.

Ke phatlalalitse tse monate phuthehong e kholo,

ha kea ka ka thöla, ua tseba, Morena.

Toka ea hao ha kea ka ka ipolokela eona

boinotšing ba pelo ea ka,

empa ke boletse botšepehi ba hao le pholoho ea hao.

Ha kea ka ka patela phutheho e kholo mohau le ‘nete ea hao.

Ho baloa Evangeling e halalelang e ngotsoeng ke Mareka.        (1,29-39)

A folisa bakuli ba bangata ba neng ba jeoa ke mafu a mefuta-futa

Ka nako eo, ha Jesu a e-tsoa tlung ea thapelo, a kena ha Simone le Andreas, a e-na le Jakobo le Joannes. Mohoehali oa Simone o n’a robetse ke feberu, ‘me ba phakisa ba tsebisa Jesu ho kula ha hae. Jesu a atamela, a mo tšoara ka letsoho, a mo emisa. Hang feberu ea mo tlohela, a ba a ba sebeletsa.

Eare ka phirimana, ha letsatsi le se le liketse, ba mo tlisetsa bohle ba kulang le ba tšoenngoang ke bademone, ‘me motse kaofela o n’o bokane monyako. A folisa bakuli ba bangata ba neng ba jeoa ke mafu a mefutafuta, a leleka bademone ba bangata, empa a sa ba lumelle ho bua, hobane ba ne ba mo tseba.

A tsoha e sa le ka meso, a tsoa motseng, a ikela nahathothe ‘me a rapela teng. Simone le ba nang le eena ba mo sala morao; ‘me eitse ha ba mo fumana, ba re ho eena: Bohle ba ea u batla. ‘Me a re ho bona: A re eeng nq’e ‘ngoe metseng e haufi, ke tle ke rute le hona teng, hobane ke tletse hona.

‘Me o n’a ea le Galilea eohle, a nts’a ruta matlung a bona a thapelo, a bile a leleka bademone.