Moeletsi oa Basotho Labone
Ho baloa Bukeng ea Sefela sa Lifela.(2,8-14)
“Moratuoa oa ka ke eo a e-tla, a tlola lithaba.”
Utloang moratuoa oa ka! Ke eo a e-tla, a tlola lithaba, a tšethema maralla. Moratuoa oa ka o ka letsa kapa lelinyane la khama. Ke eo, o s’a eme ka mora’ lerako leso; o hlahetse le fenstereng, o nyarela ka lipakana.
Moratuoa oa ka o bua le ‘na, o re: Tsoha, moratuoa, palesanyana ea ka, tloo! Joale mariha a fetile lipula ha li sa le eo, li ile; lipalesa li hlahile naheng, nako ea lipina e fihlile, ho lla ha leebana-khoroana ho se ho utloahala fatšeng la habo röna, sefate sa feiga se qala ho beha tholoana tsa pele, le morara o thuntse, o nkha hamonate.
Tsoha, moratuoa, palesanyana ea ka, tloo! Uena leeba la ka, le lulang mafarung a mafika, mahaheng a lilomo, mpontše sefahleho sa hao, lentsoe la hao le utloahale tsebeng tsa ka, kaha lentsoe la hao le monate le sefahleho sa hao sea khahleha.
PESALEMA 32 (2-3.11-12.20-21.1.3)
Etsetsang Morena litlatse, lona ba lokileng, ‘mineleng sefela se secha.
Bokang Morena ka harepa,
le mo letsetse cithara.
‘Mineleng sefela se secha,
le li tilinye ka makhethe le ntse le khelekenya.
Morero oa Morena o tiile ka mehla,
mehopolo ea pelo ea hae ke ea meloko le meloko.
Ho lehlohonolo sechaba
seo Morena e leng Molimo oa sona,
seo a ikhethetseng sona ho ba lefa la hae.
Meea ea röna e lebella Morena,
ke eena thuso le thebe ea röna.
Pelo tsa röna li ithabela ka eena,
hobane re ts’epile lebitso le halalelang la hae.
Ho baloa Evangeling e halalelang e ngotsoeng ke Luka.(1,39-45)
“Ho ntlhahela kae hore ‘M’a Moren’a ka a tle ho ‘na?”
Ka nako eo, Maria a tloha, a ea maloting ka phakiso, motseng o mong oa Juda. A kena ka tlung ea Zakaria ‘me a lumelisa Elizabetha. ‘Me ha etsahala hore ha Elizabetha a utloa tumeliso ea Maria, ngoana a hla- simolohe popelong ea hae, ‘me Elizabetha a tlala Moea o Halalelang. Eaba o höoa ka lentsoe le matla, a re: U lehlohonolo har’a basali, ‘me ho lehlohonolo tholoana ea popelo ea hao. ‘Me ho ntlhahela kae hore ‘M’a Moren’a ka a tle ho ‘na? Hobane ke mona, hang ha lentsoe la tumeliso ea hao le kena tsebeng tsa ka, ngoana a hlasimoloha ke nyakallo popelong ea ka. Ho lehlohonolo uena ea lumetseng, hobane tseo u li boleletsoeng ke Morena li tla phethahala.
