Moeletsi oa Basotho Labobeli
Ho baloa Bukeng ea Moprofeta Daniele (2, 31-45)
“Molimo o tla hloma ‘muso o ke keng oa timetsoa le ka mohla oo puso ea oona e ke keng ea fetela sechabeng se seng.”
Matsatsing ao, Daniele o ile a re ho Nebukadnezare: Khosi, u bile le pono, u bone setšoantšo se seholo. Setšoantšo sena se ne se le seholohali ‘me se khanya ka mokhoa o makatsang. Se ne se eme ka pel’a hao, chebong se tšabeha. Hloho ea sona e n’e le gauda e tšekehileng, sefuba le matsoho a sona e le silvera, mpa le lirope tsa sona e le koporo, meomo e le tšepe, ha maoto ‘ona e le tšepe ka nq’e ‘ngoe le letsopa ka nq’e ‘ngoe.
Eare u sa ntsane u shebile, lejoe la khephoha thabeng le sa thetsoa ke motho, la otla maoto a setšoantšo a entsoeng ka tšepe le letsopa, ‘me la a pshatla. Eaba ho pshatleha tsohle, tšepe, letsopa, koporo, silvera le gauda. Tsa e-ba joaloka ‘moko seotlong nakong ea ho pola, tsa fefoloa ke moea, ha se ke ha sala letho. Athe lejoe le ileng la otla setšoantšo la fetoha thaba e kholo, e ileng ea tlala lefatše lohle.
Toro e bile joalo. Joale re tla hlalosetsa khosi seo toro e se bolelang. Uena, khosi, u khosi ea likhosi; ke uena eo Molimo oa leholimo a mo fileng ‘muso, matla, borena le letlötlo. O behile matsohong a hao bana ba batho, liphoofolo tsa naha le linonyana tsa leholimo, kae kapa kae moo Ii phelang teng, ‘me o u entse morena oa tsena tsohle. Hloho ea gauda ke uena.
Ka mora’ hao, ho tla hlaha ‘muso o mong, o tlasana ho ona oa hao; e nt’o ba ‘muso oa boraro, oa koporo, o tla busa lefatše lohle. ‘Muso oa bone oona o tla ba thata joaloka tšepe, o tšoane le tšepe e pshatlang ‘me e sililang ntho tsohle; joaloka tšepe e thuhang, o tla silila le ho thuha mebuso e meng eohle.
Seo u se boneng hape, e leng maoto le menoana, ka nq’a ‘ngoe e le letsopa la sebopi, ka nq’a ‘ngoe e le tšepe, e tla ba ‘muso o arohaneng; o tla ba le bothata ba ts’epe, joaloka ha u bone ts’epe e tšoakane le letsopa. Empa hobane menoana ea maoto e n’e le t’sepe ka nq’e ‘ngoe, le letsopa ka nq’e ‘ngoe, ‘muso oo o tla ba thata ka nq’e ‘ngoe, ka nq’e ‘ngoe o fokole.
Seo u se boneng, e leng tšepe e tsoakaneng le letsopa, ke hore batho ba tla theha selekane tlas’a lenya!o, empa ba ke ke ba khoramelana, joaloka ha tšepe e sa tsoakane le letsopa.
Mehleng ea likhosi tseo, Molimo oa leholimo o tla hloma ‘muso o ke keng oa timetsoa le ka mohla, oo puso ea oona e ke keng ea fetela sechabeng se seng. O tla pshatla, o felise mebuso eo kaofela, empa oona o tla ba teng ka mehla. Ke se boleloang ke lejoe, leo u le boneng le khephoha thabeng le sa thetsoa ke motho, le pshatla t’sepe, koporo, letsopa, silvera le gauda.
Molimo ea matla o tsebisa khosi se tla etsahala mehleng e tlang. Toro ke ‘nete, ‘me tlhaloso ea eona e nepahetse.
Pesalema (3, 57-61. 59)
Mo roriseng le mo phafe ka bosafeleng
Bokang Morena, löna mesebetsi eohle ea Morena,
mo roriseng, le mo phafe ka bosafeleng.
Bokang Morena, lona mangeloi a Morena,
mo roriseng, le mo phafe ka bosafeleng.
Bokang Morena, lona maholimo,
mo roriseng, le mo phafe ka bosafeleng.
Bokang Morena, lona metsi ‘ohle
a ka holim’a maholimo,
mo roriseng, le mo phafe ka bosafeleng.
Bokang Morena, lona makhotla ‘ohle a Morena,
mo roriseng, le mo phafe ka bosafeleng.
Ho baloa Evangeling e halalelang e ngotsoeng ke Luka (21,5-11)
“Lejoe le ke ke la siuoa holim’a lejoe le leng.”
Ka nako eo, batho ba bang ba ne ba bua ka Tempele, ba re e ahiloe ka majoe a matle ‘me e khabisitsoe ka limpho. Jesu a re ho bona: Ho tla tla matsatsi ao ka ‘ona, linthong tseo le li bonang, lejoe le ke keng la siuoa holim’a lejoe le leng, le sa liheloe fatše. Eaba ba ‘motsa, ba re: Moruti, tseo li tla etsahala neng, ‘me pontšo e tla ba efe ha li tla qala ho etsahala?
Jesu a ba araba, a re: Hlokomelang, le tle le se ke la thetsoa hobane ba bangata ba tla tla ka lebitso la ka, ba re. Ke ‘na Kriste ‘me nako e se e le haufi. Empa le se ke la ba sala morao. Le hona mohla le utloang lintoa le mefere-fere, le se ke la tšaba; e ka khona tsena Ii etsahale pele, empa e tla be e e-s’o be bofelo.
A eketsa, a re: Sechaba se tla tsohela sechaba matla, le ‘muso o mong; ‘me ho tla ba teng litšisinyeho tse kholo tsa lefatše libakeng tse ling, le mafu a seoa le litlala libakeng tse ling; ho be le lintho tse tšosang le lipont’so tse kholo leholimong.
