Nthabeleng Seitlheko Dr. Mahali Phamotse o re polelo e phatlalalitsoeng ke Lihlooho tsa Litsi tsa Tšireletso e sisinya Molao-Theo oa naha hobane ke teko ea ho fanyeha Molao oa Motheo. O buile tsena tulong ea Ntlo ea Bakhethoa ka la 19 Mphalane monongoaha.
O totobalitse ka ho otloloha hore ho bonahala li rata ho ipehela puso e ratoang ke tsona ’me ha ba hloka ho etsa joalo ba fetole molao. A re mosebetsi oa tsona ke ho sireletsa sechaba le thepa ea sona Molao oa Motheo, le puso . O re ba bonahala ba sireletsa puso ka matla a mponyane ‘me hoo ho theola puso e khethiloeng ke sechaba seriti.
A re Lesotho mona ha ba sebetse ka ho khetha Tona-Kholo ba sebetsa ka ho khetha bakhethoa, moo e bang ho na le bakhethoa ba sa hapang mabatooa a 80, b’a ipuha e le maparamente hore na puso e etelloa pele ke mang.
A re taba ena e hlokolosi hobane liketso li ntse li etsahala ho kenyeletsa tsa ho tšoaroa ha Moetapele oa SR Adv. Mojapela. O re taba ena ke koli ea malla hobane e lukile tšireletseho ea sechaba. A bontša sechaba se’a etseletsoa ha ho thoe se khethile Tona-Kholo hobane se khethile maparamente mabatooeng.
A re ha ho hlokahale hore ba hulanye molao haholo oa tlhopho-bocha, empa ba lokela ho etsa seo ka molao le boitlhompho, e le hore eona tlhopho-bocha e tsebe ho sebetsoa ka mokhoa o nepahetseng.
A re ‘muso o khetheloa ka paramenteng ‘me ke eona e etsang mosebetsi, hore naha e sebelisa moetlo oa balichaba ho khetha Tona-Kholo ha se ho hlokisa naha botsitso, hobane ho sebetsoa joalo.
Moetapele oa Mokha oa Sechaba sa Basotho, Mofomobe o re Litsi tsa Tšireletso li tsoetsoe ke ntlo ena ka ho etsa molao o li tsamaisang, ka hona ho bohlokoa hore li baballe Molao oa Motheo oa naha, hape ha se boikarabello ba tsona hore na paramenteng ho sebetsoa joang. A re taba ea hore batho ba lumela hore ha ba tšoere lithunya ba ka laola batho ba se senang tsona, kapa ho laola naha kamoo ba ratang ha ho’a nepahala, naha e tsamaisoa ka molao. A re ka lilemo tsa 2016 le 2020 ho ile ha fetoloa Tona-Kholo, ‘me ho ne ho se moo Litsi tsa Tšireletso li nyonyobang le bapolotiki.
