Nthabeleng Seitlheko E le ntlafatso ea phano ea thuto sechabeng, World Vision e ipilelitse ho baphatlalatsi ho fana ka thuto ho sechaba hore se ikemele khahlanong le likoluoa tse se tobileng. Litaba tsena li boletsoe ke moeletsi oa bobuelli le bophatlalatsi morerong oa taolo ea likoluoa World Vision, Thapelo Tseko, ka la 19 Loetse monongoaha.
O re morero oa bona o tl’o kena ts’ebetsong o reretsoe ho tla arabela litaba tsa tlokotsi le ho sebetsana le tsona pele li etsahala ka ho fana ka thuto sechabeng. A re ha ho na letho le ka atlehang kantle ho ts’ehetso ea bophatlalatsi, kaha litaba li fihla habonolo ho sona ka ts’ebetso ea bona.
A re mosebetsi oa morero ona ke ho bona hore na ba thusa sechaba joang ho its’ireletsa khahlanong le litlamorao tse tla bakoa ke komello e tlo ba teng kahare ho naha. A re ba tl’o sebetsana le morero ona nakong ea lilemo tse peli, haholo ba shebile sechaba se phelang ka maloting se sa fihleleheng ha bobebe, ‘me ba tla sebetsa Maseru e ka maloting, Leribe, Thaba- Tseka le Mokhotlong.
A re ba tl’o ntlafatsa sechaba ka thuto le ho ntlafatsa bophelo ba bona, ‘me ba rata le ho anetsa boithuto ka likoluoa. A re baphatlalatsi ba elelloe hore ha ba tlaleha litaba ho bohlokoa hore ba sebelise bopaki le mantsoe amehelehang.
Reentseng Phephetho Mookameli Lefapheng la Bophatlalatsi le marang-rang World Vision, o itse mosebetsi oa bona ke ho aha likamano le sechaba ho se beha leseling ka litaba tse etsahalang, haholo likoluoa tse amang bophelo ba bona. A re ha bophatlalatsi bo na le tsebo, sechaba se utloisisa kapele le ntlafalo e ba teng kahar’a sechaba.
O re baphatlalatsi ba lokela ho sebetsa ka thata ho fana ka litaba tse etsahalang, le hore ba shebe litlhoko tsa batho ba oetsoeng ke koluoa, kapa ba nang le mathata hore maemo a bona ke afe ho fana ka taba e etsahalang.
Lebitsong la baphatlalatsi ba bileng ‘mokeng ona, ‘Masentle Makara, o itse ba ithutile hore ba lokela ho tlaleha ka likoluoa tse etsahalang khafetsa molemong oa ho fetisetsa thuto sechabeng. A re leha ho le joalo, litsebi li lokela ho fumaneha nako le nako ho thakela sechaba ka malebela ha ho hlokahala, ‘me mekhatlo e ikemetseng e lokela ho reka mananeo, ho reka likheo tsa litaba likoranteng le ho sebelisa marang-rang le boqapi ho fetisa melaetsa ho sechaba.
O bile a ipiletsa ho baphatlalatsi hore ba tlalehe litaba ba ipapisa le mehoo eo lefats’e le litlokotsi tse tlelang Basotho, molemong oa sechaba se itlhophileng.
Morero ona oa ho thibela likoluoa pele li etsahala le ho thakela sechaba ka malebela oa World Vision ke oa lilemo tse peli ‘me o ts’ehelitsoe ka lichelete ke European Union.
