Nthabeleng Seitlheko Mookameli oa Mokhatlo oa Lesotho Network of Development for the Blind Lieketseng Machalotse, o re khaello ea likolo tsa batho ba nang le bokooa ke phepetso e kholo kahare ho naha, kaha e le ts’ekisetso thutong hoo bana ba bang ba qetellang ba kena sekolo ba se ba le baholo. O boletse tsena puisanong le koranta ka la 19 Loetse monongoaha.
O re boholo ba likolo kahare ho naha li amohela bana ba se nang bokooa, ha likolo tse teng tse sebetsang le bana ba nang le bokooa li le peli fela kahare ho naha. A re hona ke qholotso e kholo e bonts’ang sekheo se teng thutong ea bana ba nang le bokooa, ‘me lipalo tsa bana ba nang le bokooa li ntse li phahama.
A re bana ba bang ba qetella ba sa kene likolo hobane ba nka maeto a malele le ho fihla likolong, ‘me bao batsoali ba se nang bokhoni ba ho ba isa likolong tse hole ha ba kene sekolo, ha ba bang ba kena sekolo empa ba hloka lisebelisoa.
Machalotse o re ke 90% ho isa ho 95% ea bana ba nang le bokooa ba tsoang malapeng a futsanehileng, ‘me bana ba holelang malapeng a joalo ho fumana thuto ea boleng ke bothata hobane ba hloka lithuso tse matla. A re ba rata hore likolo tsohle kahare ho naha li amohele bana ba nang le bokooa kaha le leano la thuto le supa thuto e kenyeletsang bana bohle.
A re litaba tsena li qhololitse hore mokhatlo oa habo o tsoe lets’olo ho ea fana ka thuto seterekeng sa Mafeteng hore ho be le sekolo sa bana ba nang le bokooa se tla sebelisoa ho khahlametsa baithuti ho hlaha literekeng tsa Qacha’s Nek, Quthing le Mohale’s Hoek, ka hona ba ipiletsa ho ‘Muso oa Lesotho ho ts’ehetsa likolo tsa bana ba nang le bokooa ho bona hore thuto e anela bana bohle.
Mookameli oa Mokhatlo oa batho ba nang le bokooa ba Masapo, Molise Foso, o itse ba leboha mokhatlo ona ka ho khothaletsa hore litereke tsa Qacha ‘s Nek, Quthing le Mohale‘s Hoek li theheloe sekolo se ka fokotsang sekhahla sa baithuti ba tsoang libakeng tse ling ho tla Maseru sekolong. A re thuto ea bana ba nang le bokooa e ntse e sa khotsofatse, ‘me ba ntse ba loanela hore likolo tsohle li ananele bana ba nang le bokooa ka ho bonahala ka ntlafalo ea meaho le libaka tseo ba tsamaeang ho tsona.
A re ba boetse ba khothaletsa hore litichere li koetlisoe, ho sebetsana le bana ba nang le bokooa le baithuti ba tloaele ho kena ‘moho le ba nang le bokooa hore ba tsebe ho amohelana. A re likolo tsa bana ba nang le bokooa li lokela ho atolosoa, empa ebe tse sebetsanang le bana ba nang le bokooa bo tebileng.
