Nthabeleng Seitlheko Moetapele oa PFD, Advocate Lekhetho Rakuoane o ngoletse Mongoli oa Lekhotla la Sechaba lengolo le mo tsebisang ka ho phetheloa ha sehlomathiso sa molao oa thibelo ea bosholu ba liphoofolo ele ho tlisa ntlafalo phanong ea likahlolo tse tla fanoa ho li tloli tsa molao tsa liphoofolo. O hlalositse tsena puisanong le koranta ena, ka la 12 Loetse monongoaha.
O re o ile a ts’oara likopano le mafapha a fapakaneng ho bokella maikutlo a bona holima sehlomathiso sa molao oa thibelo ea bosholu ba liphoofolo, ‘me o phethetse mosebetsi oo ka katleho hobane o se a ngotse tsisinyo e eang paramenteng le ofisi ea molao ‘moho le ea motamaisi oa lipuisano paramenteng hore li tle li fane ka tumello ea hore a tle a teke sets’oants’o seo sa molao.
A re ba shebile mekhahlelo e ‘meli ea bosholu ba liphoofolo eleng moo bosholu bo entsoeng ka likhoka kapa lithunya bao bona ba tla ahloloa lilemo se 25 ho ea holimo ba le Setsing sa Tlhabollo ea Bats’oaruoa, ea utsoitseng ntle le likhoka kapa boqhobane o tla a hloloa lilemo tse 5 ho isa ho tse 10 a le ka setsing.
Rakuoane o re ebang sehlomathiso sena sa molao se tla feta paramenteng, ba tla be ba hlapile matsoho ponts’eng le ho khutlisa ts’epo ea Basotho ea hore paramente ha e etse melao.
Ntlo ea paramente e ne e lumelle Advocate Rakuoane, ho tsoelapele ka ho hlomathisa molao oa bosholu ba liphoofolo tlasa melaoana ea tsamaiso ea ntlo ea 52 (2), ‘me tseo Advocate Rakuoane a li entseng, li kenyeletsa likotlo tse kollang molaong ho ba fumanoang ba le molato le phano ea bail ho masholu a liphoofolo.
Ho sa le joalo, sehlomathiso sena se tlo thusa makhotla ho matlafatsa likahlolo tseo a li fanang ho masholu a liphoofolo le ho ts’ohloa ke litho hang ha lekhotla la sechaba le khutla phomolong ea mariha.
E mong oa lihoai tsa leruo la farelane le seiboko Khotsang Moshoeshoe, o itse sehlomathiso sena sa molao ha se ka ananeloa ke paramente se tla ba pholosa hobane masholu a iketsetsa borata ka liphoofolo tsa bona. A re hoa nepahala hore ho fanoe ka likahlolo tse boima ho masholu a liphoofolo hobane ha ba senyetse bona feela empa le naha ka bo eona.
A re sehlomathiso seo se lokela ho fana le ka kotlo e totobetseng tsa puseletso ea thepa ho ea senyelitsoeng eseng ba ahloloe feela, ho boeloe ho matlafatsoe molao oa ts’ireletso ea liphoofolo le ho hlalosoa ho ea ka boleng ba tsona. A re taba e kholo ke moo e bang motho o rekile ramo ka chelete e ngata e hlalosoe joaloka nku empa ele ea boleng bo phahameng.
O bile a ipiletsa ho maparamente ho sebetsa ka thata ho etsa melao e sireletsang sechaba le liphoofolo khahlanong le masholu kaha ele lira tsa naha ena, ba bakela Basotho bofutsana le khoholeho ea moruo kahara naha ka ho ba utsoetsa liphoofolo.
