Nthabeleng Seitlheko Basotho ba lilemo li mahareng ho tsoa mekheng le makhotleng a lipolotiki a fapakaneng, ba re ba ts’oenyehile ke morero o mocha oa ‘muso oa thekiso ea metsi kaha hoo ele ho rekisa naha le ho amoha Basotho bolokolohi ba ho iphelisa ka metsi. Ba boletse tsena ‘mokeng oa bo-ralitaba oa la 12 Loetse monongoaha.
Ba re morero ona o bitsoang Metsi ke Bophelo ha o’a ts’oarela naha letho le hore metsi a Lesotho a lutse sehlekehlekeng ha se taba e teng, empa morero ke ho tla rekisa metsi a Lesotho ka sekhukhu.
Thabelo Mohafeli ho hlaha kahara ABC o itse ebang ‘muso o ka kenya morero oa metsi ke bophelo ts’ebetsong e tla be e le ho se natse litokelo tsa mantlha tsa sechaba, ‘me ke sesupo sa hore ba thehile lets’olo ho tsekisa Basotho litokelo tsa bona tsa metsi. A re ho hlakile hore ha morero ona o ka sebetsa, Basotho ba tla thatafalloa le ke ho noesa liphoofolo tsa bona linokeng.
A re taba ena ke ho theha lefapha hore ba tle ba hloke litlaleho tsa ts’ebeliso ea metsi kaha ho boetse ho na le tsitsipano thekisong ea metsi le batho ba boemong bo tlase ba tlo iphumana ba se na ona hobane morero oa bao ho etsa liphaello tsa chelete.
A re ha ba tlo lumella bobolu bo pepenene ba thekiso ea metsi kahara naha kaha khoebo eo e ne e so ngolisoe ha e qala liphutheho tse eona, ke hona e qalang ho ngolisoa ka la 6 Loetse 2023. A re ha ho litsela tse hlakileng hore na ‘muso o kopana joang le khoebo ena kaha e le kotsi.
Montoeli Ramaipato ho hlaha kahara RFP o itse Basotho ha ba tlo qhekelloa ka letho ba ntse ba bona hore morero ona ke oa ho kotela litokelo tsa Basotho thekong le thekisong ea metsi joaloka litaemane tse sebeletsang melata fela. A re metsi a se a tlo rekoa ke Basotho ho molata ea tla tsamaisa morero oo, hobane a tla be a filoe litokelo tsa metsi a Basotho, ‘me ha ho kuno e tla ba teng sebakeng sa Basotho, empa khoebo e joalo e tlo una molemo.
Moeketsi Shale ho hlaha kahara DC, o itse ba tlo sebetsa ka thata hore morero ona o seng molemong oa Basotho o se tsoelepele hobane o tlo hatikela mafutsana ‘me Lesotho le tla be le lahlehetsoe ke lihloliloeng tsohle. A re ho sebetsa litaba tsena ba ngolletse Tona-Kholo ea Naha ea Lesotho lengolo Letona la Lihloliloeng le Merafo le komiti ea paramente e alositseng lihloliloeng ho mo hlokomelisa ka taba ena.
Mphonyane Lebesa ABC o itse ba ke ke ba sebetsa ka liphoso tse e ntsoeng ke babusi ba fetileng, ka hoo lilemong tsa bona ba lokela ho nka likhato ho sireletsa naha ena. O re methati e meng eo ba tlang ho e nka ke ho nka likhato tsa molao khahlanong le morero oo le ho etsa mokoloko oa nyatso. A re ba lokela ho sireletsa naha ea bo bona le bophelo ba Basotho hobane lintho tse kotsi linaheng tse ngata li qala ho sebelisoa ke Basotho, kahoo ba ke ke ba tlohela sena sa etsahala.
Letona la Lihloliloeng le Lirafshoang le itse morero oa Metsi ke Bophelo ke ntho e teng empa e le hore ho tlo ts’oaroa seboka seo ho menngoeng libui tse hlahang linaheng tse ling, Basotho le likolo tse phahameng moo ho tlo buisanoa ka metsi a Lesotho hore a ka sebelisoa joang e le karolo ea ho theha mesebetsi le menyetla e teng ka ona.
A re ntho e kholo ke ho hohela batseteli hore ba tsebe Lesotho ke naha e ipabolang ka metsi a hloekileng, e tle e nkoe ele eona e kaholimo-limo litabeng tsa metsi moo bohle ba ratang ho tseba ka metsi ba tla tla Lesotho. A re kamora seboka seo ho tla ba le pokello ea maikutlo a Basotho moo ho tla botsoa Basotho hore na ba lakatsa ho etsoe eng ka metsi.
A bonts’a hore Basotho ba reng morero oa Metsi ke Bophelo ke ho rekisa metsi ha se ‘nete empa ba rata ho lahla sechaba kaha ba rata batho ba lutseng ‘nqa ele ‘ngoe ba sa etse letho.
H’a phethela o ipilelitse ho Basotho ho se itumelle ho thetsoa empa ba bale, ba utloisise li ntho le ho botsa moo ho hlokahalang.
