Nthabeleng Seitlheko Motlatsi oa Mongoli e Moholo Lekaleng la Mahlale le ts’ebeliso ea Mahlale, Neo Ramabele Semethe, o re naha ea Lesotho e lokela ho ba le molao o sireletsang ts’ebeliso ea marang- rang e le ntlafalo e bolokehileng ea ona kahara naha. O boletse tsena puisanong le koranta ena, ka la 11 Loetse monongoaha.
A re ‘muso o lokela ho bona hore Basotho ka mekhahlelo eohle e utloisisa ts’ebeliso ea marang-rang le ho tseba hore ba lokela ho isireletsa joang. A re ho kotsi hore naha e hloke melao e sireletsang marang-rang hobane ke moo ho its’emang lintho tse ngata ho kenyeletsa le ts’ebeliso e mpe ea litokomane tsa batho, mabitso le ho ameha litabeng tsa thekisetsano ea batho.
O re lekala la habo ka ts’ehetso ea kamphani ea ITU le ts’oarela mafapha a fapakaneng thupelo ho kenyeletsa maparamente hore ba utloisise litaba tsa ts’ebeliso ea marang-rang. A re ba mothating oo naha ea Lesotho e ntseng e sebetsana le ho fetisa sets’oants’o sa molao oa ts’ireletso ea marang-rang molemong oa polokeho ea batho bohle.
Marwan Ben Rached, ho hlaha kamphaning ea International Telecommunication Union ( ITU) o itse ho bohlokoa hore naha e ‘ngoe le e ‘ngoe e sireletse ts’ebeliso ea eona ea marang-rang ho qoba ts’ebeliso e mpe ea ona. A re ke linaha tse ngata tse sebelisang marang- rang tse ileng tsa keneloa ke bakhosheli kahara mafapha a bona a polokelo ea litokomane kahara mebuso.
A re linaha li lokela ho fetohela ts’ebelisong e bolokehileng ea marang-rang molemong oa bolokolohi, polokeho ea sechaba le ea naha. O bile a khothaletsa naha ea Lesotho ho sebetsa ka thata ho ntlafatsa melao ts’ebelisong ea marang-rang molemong oa ho nolofaletsa makhotla ho fana ka likotlo khahlanong le batho ba etsang litlolo tsa molao oa marang-rang.
Ea bileng ‘mokeng ona , Ithabeleng Qhasho, o itse naha ea Lesotho e lokela ho ntlafatsa ts’ebeliso ea marang-rang molemong oa ho qoba ts’ebeliso e mpe ea ona joalokaha ho bonahala ho a mang a marang-rang batho ba nyefoloa le ho sebelisoa hampe haholo lits’oants’o.
A re marang-rang ke ntho ea bohlokoa e ka fetolang bophelo ba naha moruong kaha batho ba bangata ba se ba sebelisa ona ho rekisa lihlahisoa tsa bona. A re o lumela hore ke nako ea hore ‘muso o sebeletse ho fetisa sets’oants’o sa molao se sireletsang marang-rang empa e se ke ea e-ba se hatikelang litokelo tsa mantlha tsa botho ebe tsa bolokolohi ba puo.
O re seo a se tsebang ke hore sets’oants’o se ileng sa huloa paramenteng , se na le likaroloana tseo ho tsona ho tlo ameha bophatlalatsi haholo moo se buang ka hore ha mophatlalatsi a ka ngola kapa ho phatlalatsa litaba ntle le tumello ea motho ea ikarabellang lefapheng o tla nkeloa likhato tsa molao le ho fana ka lebitso la ea faneng ka taba e joalo.
Qhasho a ipiletsa ho ‘Muso oa Lesotho le maparamente ho hlahloba ka matla sets’oants’o sa molao se sireletsang ts’ebeliso ea marang-rang kaha ha ba ka se fetisa se le joalo le bona ba ntse ba tla ameha ho litemana tse ling tsa sets’oants’o seo sa molao.
