Nthabeleng Seitlheko Mohlophisi oa litaba tsa lipolotiki Koranteng ea Lesotho Times le Sunday Express ‘Marafaele Mohloboli, o hapile khau ea ho ba motlalehi ea hloahloa litabeng tsa lipolotiki le tsa basali boemong ba likoranta. Tsena li bile ka la 9 moketeng oa ho tlotla basali bophatlatsing o neng o hlophisitsoe ke mokhatlo oa IFO Lapeng.
Mohloboli o itse khau ena ke ntlafalo mosebetsing oa hae hobane le ha eba ho na le moo a khibelang mosebetsing empa ho na le batho ba bonang mosebetsi oa hae. A re o tletse ka matla hore o ntse a ts’oere hantle ‘me a tsoelepele ho etsa hantle, hobane khau tsena li tlo ba haufi le pelo ea hae hobane li fihla a le boemong ba ho beha meja fats’e bophatlalatsing a bone bophelo bo bocha.
O bile a khothaletsa baokameli litsing tsohle tsa bophatlalatsi ho ts’ehetsa baphatlalatsi mesebetsing eohle eo ba e etsang hobane ba sebeletsa sechaba, ka hona liqholotsong tsohle ba fetohe metsoalle ho holisa bophatlalatsi ba naha ena.
Letona la Lipapali, Bochaba le Nts’etsopele ea Sechaba Mohlomphehi Pitso Lesaoana o itse Basali ke batho ba bohlokoa ba hlokoang ke naha e ‘ngoe le e ‘ngoe ho hola. A re ha baphatlalatsi ba basali ba ne ba le sieo ho ne ho tla ba le sekheo litabeng tse tlalehoang tsa sechaba joaloka tsa bophelo bo botle le tsa ts’ireletso ea basali le bana, ka hona o motlotlo ho bona basali bophatlalatsing ba hlahella ka mahetla le ho phahama mosebetsing oa bona.
Mohlophisi oa ts’ebeletso ena Rebecca Makhalemele o supile hore leha ho sa ba bobebe ho phethela leeto lena, empa o fihletse sepheo se seholo sa ho tlotla ts’ebetso ea basali kahara naha ea Lesotho. A re baphatlalatsi ba lokela ho eloa hloko, ba ntlafatsoe le ho ts’ehetsoa mosebetsing oa bona kaha kholo ea naha e matsohong a bona ka ho fepela sechaba litaba.
Ho sa le joalo, Dr. Mahlape Morai ho hlaha Sepoleseng sa Lesotho o supile hore palo ea basali ba kenang ka hara litlolo tsa molao e bonahala e ntse e phahama, hobane ho bats’oaruoa ba lekholo ba chankaneng ke bonyane 26 ea bao e leng basali. A re taba ena e re baphatlalatsi ba basali ba tsoe lets’olo ho fana ka thuto e matla sechabeng hore basali ba itsebe, ba ithate le ho ikamohela.
Lebitsong la Mokhatlo oa Basali Bophatlalatsing, Matlhohonolofatso Lebesa o bonts’itse hore tlotlo ena ke tlotla ho bophatlalatsi ka kakaretso kaha hangata basali ba baphatlalatsi ba bonahala ba sekisetsoa le hoja ba le bohlokoa.
A supa hore baphatlalatsi haholo ba basali ba thulana le liqholotso tse ngata tse kenyeletsang meputso e sa pheliseng le ho sebetsa moo ho sa amoheleheng.
Likhau tsena li hapiloe ke baphatlalatsi boemong ba li-ea-le-moea ba ts’oarang mananeo a litaba le ho bala litaba le koranta.
