Nthabeleng Seitlheko E le nts’etsopele le boitokisetso bakeng sa likhetho tsa puso ea libaka, boemeli ba mekha le makhotla a lipolotiki bo a mohetse pampiri ea likhetho mapatlelong a polokelo ea eona Warehouse Maseru, ka la 9 Loetse monongoaha.
Commissioner (IEC) Dr Karabo Mokobocho- Mohlakoana o lebohile sehlopha seo ba ileng ba tsamaea le sona ho ea lebela khatiso ea pampiri e tla sebelisoa sebakeng sa likhetho. A re mosebetsi o entsoe ka makhethe, ‘me bohle ba tsebe hore moo pampiri ena e tla bolokoa e tla lebeloa ke boemeli ba bapolotiki le litsi tsa ts’ireletso.
A bonts’a hore thepa ena e lebitsong la Basotho le tlasa leihlo le nchocho la litsi tsa ts’ireletso.
Lebitsong la mekha le makhotla a lipolotiki Pitso Pitso, o itse ba bone methati eohle e latetsoeng le polokeho ea tokomane ena, ‘me ba khotsofetse hape ba lumela hore likhetho tsena e tla ba tse nang le ponaletso joalokaha ba li hloka e le bapolotiki, sebakeng sa Basotho le Lesotho
Lebitsong la moifo oa bophatlalatsi o neng e le karolo ea sehlopha se neng se lata pampiri ea likhetho,Melida Phinda, o itse mosebetsi ona ke oa naha ‘me o bohlokoa kaha o kopaneloa ke lihlopha tse ‘maloa tsa sechaba. A re mosebetsi oa bophatlalatsi leetong lena e ne ele ho ea sheba ts’ebetso ho ithuta hore na litaba tsa khatiso li tsamaea joang hobane bophatlalatsi ke molomo oa sechaba ke bona ba fanang ka thuto le litlaleho.
A re ts’ebetso e bile e makhethe hobane mafapha ohle a neng a rometsoe a nkile boikarabello.
Moifo o ne o bopiloe ka bahlanka ba setsi sa Komisi e Ikemetseng ea Likhetho (IEC), Mookameli oa Likhetho, Motsamaisi oa Likhetho,boemeli ba mekha le makhotla a lipolotiki, ho latela mofuta oa likhetho tsa puso ea libaka, ‘me pampiri tsa ho khetha li tla ba mefuta e ‘meli kaha ho tla khethoa mokha kapa lekhotla la lipolotiki ho boeloe ho khethoe le mokhanselara.
