Nthabeleng Seitlheko Lekhotla la Kopano ea Sechaba (AD), le re le ntse le ts’ehelitse puso e etelletsoeng pele ke Tona-Kholo Samuel Ntsokoane Matekane le mekha e ts’ehelitseng puso. Tsena li boletsoe ke Mongoli e Moholo oa Lekhotla la Kopano ea Sechaba Tieho Mamasiane, ka la 4 Loetse monongoaha.
O re AD ke karolo ea selekane se thehileng puso ‘me moo e bang selekane se ka ameha ho na le methati e lateloang ho lokisa boemo. A re ba rata hore litho tsohle tsa AD li tle li sebetse ka matla hore li tle li be le ts’usumetso e kholo likhethong tsa puso ea libaka, ntlafatsong ea phano ea lits’ebeletso sechabeng, theolelo ea matla, botsitso ba naha le ho fana ka tharollo mathateng a tobileng Basotho.
A bonts’a hore ho bohlokoa hore Basotho ba kenye letsoho likhethong tsa puso ea libaka, ‘me komiti e kholo ea lekhotla e khethile komiti ea boits’oaro ho khalema ba ke keng ba etsa lintho ba ipapisitse le tsamaiso ea ts’ebetso.
Moetapele oa AD. Dr. Ntoi Rapapa, o itse bona ba ntse ba eme ba sa sisinyehe kaha lekhotla la habo le ntse le tsitsitse, ho fihlela joale.
